حالیہ مہنگائی کی لہر اور منی بجٹ کے ذریعے عوام پر مزید مہنگائی کا بوجھ ڈالنے جیسی خبروں کے درمیان عوام کیلئے ایک ٹھنڈی ہوا کا جھونکا نیپرا کی جانب سے آیا ہے جس کے مطابق بجلی کی فی یونٹ قیمت میں 99 پیسے کمی کردی گئی ہے۔
تفصیلات کے مطابق نیشنل الیکٹرک پاور ریگولیٹری اتھارٹی( نیپرا) نے بجلی کی فی یونٹ قیمت میں 99 پیسے کمی کی منظوری دیدی ہے، اس حوالے سے ترجمان نیپرا کا کہنا تھا کہ اپریل 2021 سے جون 2021 کی سہ ماہی ایڈجسٹمنٹ کی مد میں بجلی کی فی یونٹ قیمت میں کمی کی گئی ہے۔
ترجمان نیپرا کے مطابق بجلی کی قیمتوں میں کمی سے متعلق ابھی نیپرا نے منظوری دی ہے تاہم اس کا صارفین پراطلاق وفاقی حکومت کی منظوری کے بعد ہوگا، منظوری کی صورت میں اس کمی کے بعد صارفین کو 22 ارب روپے کا ریلیف مل سکے گا۔
نیپرا کے مطابق بجلی کی فی یونٹ قیمتوں میں کمی کا اطلاق کے الیکٹرک کے علاوہ تمام تقسیم کار کمپنیوں پر ہوگا۔
