پاکستان مسلم لیگ ن کے سیکرٹری جنرل احسن اقبال نے کہا ہے کہ عمران نیازی سے بہتر پاکستان کی تباہی کے مشن پہ کام کرنے والا پاکستان دشمنوں کو دستیاب نہیں ہو سکتا۔
تفصیلات کے مطابق پاکستان تحریک انصاف کے آفیشل ٹویٹر اکاؤنٹ سے ایک ورکر کا ویڈیو پیغام شیئر کیا گیا جس میں نوجوان کا کہنا تھا کہ وزیراعظم عمران خان پاکستان کی بقا کی جنگ لڑ رہے ہیں وہ پاکستان کو ایک خوددار ملک بنانا چاہتے ہیں۔ غلامی زنجیریں توڑیں اور اپنی آنے والی نسلوں کیلئے عمران خان کا ساتھ دیں۔
لیگی رہنما احسن اقبال نے اپنے ٹوئٹر پیغام میں پاکستان تحریک انصاف کی ٹوئٹ شیئر کرتے ہوئے پی ٹی آئی ورکر کو جواباً کہا کہ عمران نیازی سے بہتر پاکستان کی تباہی کے مشن پہ کام کرنے والا پاکستان دشمنوں کو دستیاب نہیں ہو سکتا جس نے اپنی نااہلی،نالائقی،انا پرستی، غرور اور نفرت کی سیاست سے ملک کی معیشت کا ستیاناس کر دیا ہے۔
انہوں نے مزید کہا کہ ملک میں محاذ آرائی کو فروغ دیا،ادارے تباہ کر دئیے، سیاسی اور بنیادی حقوق پامال کئے۔
اس سے قبل احسن اقبال نے پریس کانفرنس کرتے ہوئے کہا کہ تحریک عدم اعتماد کسی سیاسی تبدیلی کی تحریک نہیں عوام کی تحریک ہے، یہ تحریک پاکستان میں آئین و جمہوریت کو بچانے کی تحریک ہے۔
انہوں نے کہا کہ اگر یہ حکومت رخصت نہ ہوئی تو ملک دلدل میں دھنس جائے گا، آج پاکستان کی تمام سیاسی و جمہوری قوتیں ایک پلیٹ فارم پر اکٹھا ہوئی ہیں، آئین و عوام کے مفاد کے تحفظ کے لئے اس حکومت کو گھر بھیجنے کے لئے متحد ہے۔