عمران نیازی خود کو بے وقوف بنا رہے ہیں، قوم کو بے وقوف نہیں بنا سکتے۔وزیراعظم شہباز شریف کی عمران خان پر تنقید
وزیراعظم میاں محمد شہبازشریف نے سماجی رابطوں کی ویب سائٹ ٹویٹر پر اپنے ٹویٹ میں لکھا کہ پاکستان تحریک انصاف کے سوشل میڈیا ٹرولز نے پاک فوج کے خلاف نفرت بھرے ٹرینڈز چلائے، تمام پاکستانیوں اور شہداء کے خاندانوں نے یہ سب دیکھا، کیا وہ یہ سب بھول جائیں گے۔
عمران نیازی خود کو بے وقوف بنا رہے ہیں، قوم کو بے وقوف نہیں بنا سکتے۔پچھلے چار مہینوں میں پوری قوم نے دیکھ لیا ہے کہ کس طرح کے القابات عمران نیازی نے پاک فوج کی قیادت کے خلاف استعمال کیے ہیں۔
دریں اثنا ایک پریس کانفرنس کرتے ہوئے وفاقی وزیر اطلاعات و نشریات مریم اورنگزیب نے کہا کہ نجی ٹی وی چینل پر عمران خان کے چیف آف اسٹاف نے ان کا لکھا ہوا اسکرپٹ پڑھا، کوئی پاکستانی سوچ نہیں سکتا کہ شہدا کے خلاف ایسی کوئی مہم چلائی جائے، ایسی گھنائونی مہم چلانے والے پکڑے گئے اور اعتراف بھی کر لیا کہ عمران خان اور پارٹی کے کہنے پر مہم چلائی۔
عمران خان ہر روز نفرت کے بیج بورہے ہیں، جسے اب کاٹ رہے ہیں، تمام احکامات بنی گالا سے آتے ہیں اور تمام ثبوت عوام کے سامنے پیش کرینگے۔
انہوں نے کہا کہ عمران خان پاکستان میں آگ لگانے کی کوشش کر رہے ہیں، کوئی ان کا آلۂ کار نہ بنے، عمران خان کے چیف آف سٹاف شہباز گل نے تحریر شدہ بیان اے آر وائے نیوز پر پڑھا اور سکرپٹ عمران خان کا ہے، شہداء اور ان کی فیملیز کے خلاف تحریک انصاف نے مہم چلائی، ہیں، بشریٰ بی بی نے ہی ارسلان کو شہداء کیخلاف مہم کا کہا ہوگا، احکامات بنی گالہ سے ملے۔
عمران خان کو آئینی طریقے سے نکالا، کہتے ہو سازش ہوئی، اس لئے نکالا گیا کیونکہ وہ نااہل تھے، تحریک انصاف کو سب سے زیادہ نقصان عمران خان نے پہنچایا، چار سال ملک کو لوٹا، معیشت تباہ کردی، کرپشن گھر کی خواتین سے کرائی، توشہ خانہ سے تحائف لکر ڈیکلیئر نہیں کیا۔
چیئرمین پی ٹی آئی عمران خان پر تنقید کرتے ہوئے کہا کہ آپ نے خود تحریک انصاف کو فارن ایڈڈ پارٹی ڈیکلئیر کروایا، ملک کو بھی خراب کیا اور اب اداروں کی ساکھ کو بھی خراب کرنے کی کوشش کر رہے ہیں، اداروں کے خلاف کسی قسم کی حرکت برداشت نہیں کرینگے، ملک دشمنی کی اجازت نہیں ، تماشہ نہیں چلے گا۔
وفاقی وزیر نے قائد مسلم لیگ نے کے حوالے سے گفتگو کرتے ہوئے کہا کہ میاں محمد نوازشریف نے صرف اتنا کہا تھا کہ ادارے آئینی حدود میں رہیں، آج بھی ہمارا یہی موقف ہے۔ عمران خان بغاوت اور سیاسی مداخلت پر اکسا رہے ہیں، عمران خان نے کہا سب سے بڑی سیاسی جماعت کو فوج سے لڑوانے کا پلان ہے، تحریک انصاف توڑنے کی بات کی جارہی ہے۔
عمران خان خود کو نواز شریف سے کیسے ملا سکتا ہے؟، نواز شریف کے سینے میں بہت سے راز ہیں اور اور پاکستان کی خاطر خاموش رہے، آئین پر سمجھوتہ نہیں کیا، اقتدار قربان کیا، اس ملک کو جتنی ترقی نوازشریف نے دی وہ آپ سوچ بھی نہیں سکتے، ملکی بقاء ، سالمیت اور دفاع کیلئے جتنے کام کئے پاکستان کا ذرہ ذرہ گواہی دیتا ہے۔ عمران خان ادارے کو کہتے ہو مداخلت کرے، پارٹی بچائے، آپ فارن فنڈنگ میں 8 سال بعد پکڑے گئے، اس کا حساب آپ نے ابھی دینا ہے۔
