سینئر تجزیہ کار مظہر عباس نے کہا کہ چاہےعمران خان ہوں یا مریم نواز کسی کو بھی یونیورسٹی میں جاکر خطاب کرنا ان کا حق ہے۔
تفصیلات کے مطابق جیو نیوز کے پروگرام میں گفتگو کرتے ہوئے سینئر تجزیہ کار مظہر عباس نے کہا کہ مریم نواز کا یہ مطالبہ کہ تعلیمی اداروں کوسیاسی اکھاڑا بنایا جارہا ہے لہذا وی سی کے خلاف کارروائی کی جائے درست مطالبہ نہیں ہے۔
انہوں نے مزید کہا کہ عمران خان نے جی سی میں کیا تقریر کی،اس کا مواد کیا تھا یہ ایک الگ بحث ہے، جہاں تک سوال یہ ہے کہ انہیں وہاں خطاب کرنا کرنے کی اجازت ہونی چاہیے توجواب ہے بالکل ہونی چاہیے ، مریم نواز کو بھی اس جگہ پر تقریر کرنے کی اجازت ہونی چاہیے، یہ ان کا حق ہے۔
مظہر عباس نے کہا مگر اس خطاب کے دوران وی سی کو موقع پر موجود نہیں ہونا چاہیے تھا، عمران خان یونیورسٹی میں خطاب کررہے ہیں تو وہ طلبہ سے خطاب کررہے ہیں، وہ ان کا حق ہے، مگر اس جگہ پر وائس چانسلر کی موجودگی غلط ہے، ماضی میں کبھی بھی وائس چانسلرز ایسی تقاریب میں شامل نہیں ہوا کرتے تھے۔
انہوں نے کہا کہ وائس چانسلرز کی موجودگی سیاسی انٹریکشن ہے،آزادی اظہار رائے ایک بالکل الگ چیز ہے، ایم آر ڈی موومنٹ میں10 پروفیسرز نے دستخط کیے کہ سندھ میں فوجی آپریشن روکا جائے تو انہیں نکال دیا گیا تو سب نے مذمت کی۔