وفاقی وزیر منصوبہ بندی احسن اقبال کا کہنا ہے کہ عمران خان قانون سے بالاتر شخصیت نہیں، انہیں گرفتار کیا گیا تو ان کو لانڈھی جیل میں رکھا جائے گا۔ نجی چینل پر میزبان حامد میر نے پوچھا کہ اگر عمران خان کو گرفتار کیا تو کہاں رکھیں گے؟ احسن اقبال جھٹ سے بولے لانڈھی جیل کراچی میں۔
جیو نیوز کے پروگرام 'کیپیٹل ٹاک' میں گفتگو کرتے ہوئے احسن اقبال کا کہنا تھا کہ نوازشریف اور شہبازشریف نے پیشیاں بھگتی ہیں، عمران خان کہتے ہیں کہ وہ جواب دہ نہیں ہیں، عمران خان پنجاب حکومت ریموٹ کنٹرول سے چلا رہے ہیں، وہ پنجاب کے انتظامی ڈھانچے کو سیاست میں جھونکنا چاہتے ہیں۔
احسن اقبال کا کہنا تھا کہ شہباز گل کے بیان جیسا جارحانہ بیان نہیں سنا، پی ٹی آئی کے لوگ لندن کی سڑکوں میں افواج کےخلاف نعرے لگاتے رہے، پی ٹی آئی مظلوم بننے کے بجائے اپنی غلطیوں پر غور کرے، عمران خان قانون سے بالاتر نہیں ہیں۔
وفاق اور صوبائی حکومت کے آمنے سامنے آنے پر انہوں نے کہا کہ اگرکوئی صوبہ وفاق کے خلاف آئین کے خلاف یا قوانین کے خلاف بغاوت کردے تو آپ آئین کے تحت اس صوبے کی حکومت ختم کرسکتے ہیں اور گورنر راج لگا سکتے ہیں۔
وفاقی وزیر نے یہ بھی کہا چوہدری پرویز الٰہی اگر شاہ سے زیادہ شاہ کے وفادار بنے اور ایسے اقدامات کیے جو آئین کے متصادم ہوں گے تو وہ اپنی حکومت کو خطرے میں ڈالیں گے۔