متحدہ قومی موومنٹ پاکستان کے سربراہ خالد مقبول صدیقی نے کہا ہے کہ اگر عمران خان ثابت کردیں کہ واقعی غیر ملکی سازش ہوئی ہے تو ہم سڑکوں اور ایوانوں میں ان کےساتھ ہوں گے۔
خبررساں ادارے کی رپورٹ کے مطابق خالد مقبول صدیقی نے یہ بیان لیاقت آباد میں ایم کیو ایم پاکستان کی جانب سے منعقد کردہ دعوت افطار سے خطاب کرتے ہوئے دیا اور کہا کہ عمران خان خط نہ لہرائیں بلکہ سازش ثابت کریں، گزشتہ روز کراچی میں آپ کے جلسے نے یہ ثابت کردیا کہ آپ اقتدار کیلئے سازش کررہے ہیں۔
انہوں نے مزید کہا کہ ہم وزیراعظم شہباز شریف سے یہ مطالبہ کرتے ہیں کہ عمران خان کے الزامات پر ایک عدالتی کمیشن بنایا جائے جو یہ ثابت کرے کہ وہ کسی سازش کے نتیجے میں وزیراعظم نہیں بنے ہیں۔
کنوینئر ایم کیو ایم پاکستان خالد مقبول صدیقی نے کہا کہ ہم نے عمران خان کا ساتھ اقتدار کیلئے نہیں انصاف کیلئے دیا تھا، عمران خان ایک وجہ بتادیں کہ ان کی حکومت میں لاپتہ افراد کو کیوں بازیاب نہیں کروائے جاسکے؟
انہوں نے مزید کہا کہ موجودہ حکومت نے لاپتہ افراد کی بازیابی کیلئے آخری موقع مانگا ہے، ہم سمجھتے ہیں کہ ہمیں انہیں یہ موقع دینا چاہیے، اگر موجودہ حکومت نے ہمارے ساتھ کیے معاہدے پر عمل درآمد نہیں کیا تو ہم زیادہ عرصہ انتظار نہیں کریں گے، اپوزیشن کی نشستیں اور سڑکیں ہماری منتظر ہیں۔