مصر میں دوسری شادی کرنے پر بیوی نے شوہر کو عمارت کی پانچویں منزل سے نیچے پھینک دیا۔
غیر ملکی میڈیا رپورٹس کے مطابق گزشتہ دنوں ایک مصری خاتون نے اپنے خاندان کے افراد کی مدد سے فارماسسٹ شوہر کو دوسری شادی کرنے پر پانچویں منزل کی بالکونی سے نیچے پھینک کر قتل کر دیا۔
مقامی میڈیا کا کہنا ہے کہ ہلاک ہونے والا شخص بیرون ملک کام کرتا تھا اور چھٹیاں گزارنے واپس مصر آیا تھا۔ شوہر کی دوسری شادی کا معلوم ہونے کے بعد میاں بیوی میں جھگڑا شروع ہوا، تاہم بیوی نے اپنے والد، بھائیوں اور کچھ رشتے داروں کو بلایا تاکہ شوہر کو دوسری بیوی چھوڑنے پر مجبور کر سکے۔
تفصیلات کے مطابق طویل بحث کے بعد بھی جب شوہر نے دوسری بیوی کو طلاق دینے سے انکار کیا تو انہوں نے پہلے اس پر تشدد کیا اور پھر اسے پانچویں منزل کی بالکونی سے نیچے پھینک دیا۔
مقتول کے خاندان نے اپنی بہو اور اس کے ساتھ موجود لوگوں پر الزام لگایا کہ انہوں نے پہلی بیوی کے حق میں کچھ کاغذات پر دستخط کرنے کے لیے ان کے بیٹے کو تشدد کا نشانہ بنانے کے بعد قتل کیا۔ پھر وہ اس کی لاش کو ہسپتال لے گئے اور الزام لگایا کہ اس نے خودکشی کی ہے۔
تاہم، پوچھ گچھ پر مقتول کی بیوی اور اس کے اہل خانہ کے متضاد بیانات سامنے آئے جس سے پولیس کو شک ہوا۔ رپورٹ میں مزید کہا گیا کہ تفتیش کے بعد انہوں نے اسے قتل کرنے کا اعتراف کر لیا ہے۔
خبر وائرل ہونے کے بعد سوشل میڈیا پر ایک بحث چھیڑ گئی کچھ صارفین نے خاتون کو زیادہ سے زیادہ سزا دینے کا مطالبہ کیا تو کسی نے شوہر کو قصور وار ٹھہرایا۔
- Featured Thumbs
- https://www.siasat.pk/data/files/s3/3biwidhakaaaa.jpg
