پاکستان کے لیجنڈ کرکٹر شاہد خان آفریدی نے پاکستان سپر لیگ سے قبل شاہین شاہ کو تنگ کردیا جس کی ویڈیو سوشل میڈیا پر وائرل ہوگئی ہے۔
تفصیلات کے مطابق پاکستان سپر لیگ سیزن 7 کے افتتاحی میچ سے ایک روز پہلے سوشل میڈیا پر ایک ویڈیو منظر عام پر آئی جس میں بوم بوم آفریدی اور فاسٹ باؤلر شاہین شاہ آفریدی خوشگوار موڈ میں دکھائی دے رہے ہیں۔
51 سیکنڈز پر مشتمل اس ویڈیو میں کوئٹہ گلیڈی ایٹرز کے شاہد آفریدی اور لاہور قلندرز کے کپتان شاہین شاہ آفریدی گراؤنڈ میں ایک ساتھ نظر آئے۔
ویڈیو میں دیکھا جاسکتا ہے کہ جیسے ہی شاہین شاہ آفریدی نے شاہد آفریدی کو دیکھا وہ ان سے مصافحہ کرتے ہوئے بغل گیر ہوگئے جس کے بعد جیسے ہی وہ الگ ہوئے شاہد آفرید ی نے ان کو ہاتھ سے کھینچ لیا ، جیسے ہی شاہین آفریدی نے سنبھلنے کی کوشش کی شاہد خان آفریدی نے ایک بار پھر ان کے ہاتھ کو مروڑ دیا جس کیلئے شاہین شاہ آفریدی بالکل تیار نہیں تھے۔
دنیا کرکٹ کے سینئر کھلاڑی اور نجی زندگی میں ہونے والے سسر کے اس مذاق پر شاہین شاہ آفریدی صرف مسکرا ہی سکے اور شاہد آفریدی خود اپنے مذاق پر خوب محظوظ ہوئے اور انہوں نے اس کے بعد شاہین آفریدی سے دور جاتے ہوئے بھی کافی دیر تک مکالمہ کیا ۔
سوشل میڈیا پر یہ ویڈیو آگ کی طرح پھیلی اور لوگوں کے دلچسپ تبصروں کا سلسلہ شروع ہوگیا، لوگوں نے کہا کہ شاہین شاہ آفریدی شاہد آفریدی کو فیلڈ پر کیا کہہ کر پکارتے ہوں گے، شاہد بھائی، ابو جان یا لالا۔
ایک صارف نے کہا کہ سسر داماد کو چھکے مارے گا جبکہ داماد سسر کو بولڈ کرے گا۔
کچھ صارفین نے دونوں کھلاڑیوں کی اس ملاقات کو کورونا وائرس سے بچاؤ کی احتیاطی تدابیر کی خلاف ورزی بھی قرا ر دیا۔
واضح رہے کہ شاہین شاہ آفریدی کا رشتہ شاہد خان آفریدی کی بڑی صاحبزادی کے ساتھ طے کیا گیا ہے ۔