عمران خان اور پی ٹی آئی وزیرستان جا رہے ہیں۔ اور انکا مقصد ہے "ڈرون حملوں" کے خلاف احتجاج۔
یہ اچھی تحریک ہے، مگر کیا یہ زیادہ اچھا نہ ہوتا اگر پی ٹی آئی اپنے مقصد میں پی ٹی آئی کچھ تبدیلی لاتی۔
چند سوالات یہ ہیں:۔
پہلا سوال: کیا وزیرستان میں ڈرونز کے اڈے ہیں جہاں سے وہ اڑتے ہیں اور وہاں احتجاج کرنے سے ڈرون حملے رُک جائیں گے؟ کیا یہ مل کر امریکی ایمبیسی کے سامنے مظاہرہ نہیں کر سکتے؟
دوسرا سوال: اگر عمران خان کا مقصد واقعی ڈرون حملوں کو روکنا ہے، تو کیا بہترین پلان یہ نہ ہوتا کہ وہ امریکی سپلائی کو بند کرنے کے لیے اسکے روٹ پر دھرنا دیتا (جیسا کہ کراچی میں کوشش کر چکا ہے)۔ ہم سب دیکھ چکے ہیں کہ جب تک امریکی سپلائی لائن رکی رہی، اُس وقت تک کوئی ڈرون حملہ نہیں ہوا۔ مگر پھر عمران خان نے بغیر کوئی وجہ بتلائے سپلائی روٹ پر دھرنا بند کر دیا۔ اور آج ڈرون حملوں کو بند کروانے کے لیے وزیرستان جانے کا پلان بھی ڈرون کے خلاف نامکمل پلان نظر آتا ہے۔
چنانچہ پی ٹی آئی کو بتلانا ہو گا کہ انہوں نے کراچی میں سپلائی لائن کے خلاف دھرنا کیوں بند کر دیا اور آج وزیرستان جا کر ڈرون حملے بند کروانے کا ناقص منصوبہ کیوں بنا رہے ہیں؟
تیسرا سوال: اگر آپ کو وزیرستان جانا ہی ہے، تو پھر عمران خان وہاں پر ڈرون حملوں کی بجائے اپنا مقصد طالبانی خونریزی اور قتل و غارت اور دہشتگردی کو کیوں نہیں بناتا؟
کیوں ایسا ہے کہ طالبان کے خلاف احتجاج کرتے ہوئے عمران خان جیسا شیر کچھ چوہا ثابت ہونے لگتا ہے؟ بلکہ ایک عمران خان ہی نہیں، بلکہ ساری سیاسی پارٹیاں چوہا ثابت ہونے لگتی ہیں سوائے متحدہ کے جو واحد سیاسی جماعت تھی جو اسمبلیوں میں بیٹھ کر سوات کی نام نہاد امن ڈیل اور طالبان کی کھلی مخالفت کر رہی تھی۔
یاد رہے، یہ وہی پاکستانی طالبان ہے جو پی ٹی آئی والوں کے بقول "امریکی ایجنٹ" اور را کی ایجنٹ اور موساد کی ایجنٹ ہے اور انہیں کے اشاروں پر قتل و غارت کر رہی ہے، خود کش حملے کر رہی ہے، ہمارے معصوم قبائلیوں کو ذبح کر رہی ہے۔
جی ہاں، پی ٹی آئی والے یہی کہتے ہیں، وگرنہ انکا لیڈر تو کہتا ہے (یا کم از کم کہتا تھا) کہ طالبان "ہمارے بھائی" ہیں۔
ڈرون حملوں میں جتنے پاکستانی شہید ہوئے ہیں، انکی تعداد اسکا ہزارواں حصہ بھی نہیں کہ جتنے معصوم پاکستانیوں کو طالبان نے ذبح و قتل کر ڈالا ہے۔ مگر ڈرون حملوں کے خلاف تو احتجاج ہے، مگر طالبان کے خلاف احتجاج ندارد؟ اُس طالبان کے خلاف احتجاج ندارد جو کہ سی آئی اے، موساد اور را کی ایجنٹ ہے؟؟؟
کیا ہی بہتر ہوتا کہ اور زیادہ کچھ نہیں تو عمران خان اپنی وزیرستان یاترا کا مقصد ڈرون کے خلاف احتجاج کے ساتھ ساتھ سی آئی اے، موساد اور را کی ایجنٹ طالبان کے خلاف احتجاج بھی رکھ لیتا۔