سرکاری ٹی وی چینل پر رمضان ٹرانسمیشن میں نعت و مذہبی کلام کے نام پر ہونے والی ہلڑ بازی پرسوشل میڈیا صارفین کی جانب سے سخت ردعمل سامنے آرہا ہے۔
تفصیلات کے مطابق سوشل میڈیا پر سرکاری ٹی وی چینل کی رمضان ٹرانسمیشن میں سینئر اداکار و میزبان احسن خان ، رابعہ انعم اور مہمانوں کیجانب سے کی جانے والی ہلڑ بازی کی ویڈیوز وائرل ہورہی ہیں جس پر سوشل میڈیا صارفین اپنے غم و غصے کا اظہار کررہے ہیں۔
ان ویڈیوز میں دیکھا جاسکتا ہے کہ احسن خان ایک لڑکی کے ساتھ مشہور کلام "تو کجا من کجا" پڑھتے ہوئے دکھائی دے رہے ہیں جبکہ پروگرام کی میزبان رابعہ انعم بھی ان کا ساتھ دینے کی بھرپور کوشش کرتی ہیں، دوسری ویڈیو میں ان تمام افراد کو مذہبی کلام پر تقریبا ڈانس کرتے اور ٹک ٹاک کی ویڈیوز بناتے ہوئے دیکھا جاسکتا ہے۔
سوشل میڈیا پر یہ ویڈیوز وائرل ہونے پر صارفین کی جانب سے سخت ردعمل سامنےآ رہا ہے، صارفین کا کہنا ہے کہ سرکاری چینل کی ٹرانسمیشن کا یہ حال ہے تو پرائیویٹ چینلز پر کیا شوروغوغا ہوگا،ہم کس طرف جارہے ہیں، یہ ہلڑ بازی کس طرف سے رمضان ٹرانسمیشن لگ رہی ہے۔
عامر شیخ نے کہا کہ یہ کون سا اسلام ہے، اسرغف اللہ، نعت رسول ﷺ اس طرح پڑھی جاتی ہے؟ حضور کی شان میں جب کلام پڑھا جاتا ہے تو عقید ت اور عزت اور احترام لازم ہے، ان لوگوں نے مسلمان ہوکر ایسا انداز اپنایا ہے اور رمضان کے برکتوں والے مہینے کی بھی توہین کی ہے۔
ایک صارف نے کہا کہ ان کیلئے مذہب یا رمضان کچھ بھی نہیں، سب کچھ کمرشل اور مال کمانے کے طریقے ہیں۔
فرح علی نے کہا کہ نعت پر بھی تھرکنا اور تقریبا ڈانس والے اسٹیپ کرنے یں تو ایسی نعت پر ثواب ملے گا یا گناہ؟
اسماعیل بیگ نے کہا کہ ہم ڈرامہ اور کھیل کے ہیروز کو حقیقی زندگی میں بھی ہیروز سمجھ لیتے ہیں اور سمجھتے ہیں کہ وہ ہر شعبے میں پرفیکشن دکھائیں گے،رانگ نمبرز وہی کریں گے جو میڈیا چینلز والے چاہیں گے، سب گول مال ہے۔
