پاکستان تحریک انصاف کے منحرف ہونے والے رکن قومی اسمبلی راجا ریاض کے اپنے خاندان نے ان کے فیصلے سے مخالفت کرتے ہوئے تحریک انصاف کے ساتھ کھڑے رہنے کااعلان کردیا ہے۔
تفصیلات کے مطابق فیصل آباد سے قومی اسمبلی کی نشست این اے110 سے پاکستان تحریک انصاف کی ٹکٹ پر منتخب ہونے والے راجا ریاض کی جانب سے پارٹی سے بغاوت کے اعلان کے بعد ان کے اپنے خاندان نے ان کی مخالفت کردی ہے۔
راجا ریاض خاندان کے حقیقی رہنما اور سابق رکن صوبائی اسمبلی میجر راجا سجاد اکبر کے صاحبزادے راجا ضرار سجاد نے اپنے ویڈیو بیان میں راجا ریاض کی مخالفت کرتے ہوئے کہا کہ اپنے خاندان میں سب سے پہلے میں عمران خان کے نظریے کے ساتھ کھڑا ہوا تھا۔
انہوں نے کہا کہ اس سیاسی افراتفری کے وقت میں میں عمران خان کے سیاسی مخالفین اور مشکل وقت میں ساتھ چھوڑ جانے والوں کو یہ پیغام دینا چاہتا ہوں کہ بغض عمران میں ملک پاکستان کی مخالفت سے گریز کریں۔
راجاضرار سجاد نے مزید کہا کہ انشااللہ اوآئی سی کانفرنس کا انعقاد بھی کامیابی سے ہوگا اگر کسی نے او آئی سی کو روکنے کی حماقت کی تو یہ قوم اس کا محاسبہ کرے گی،انشااللہ عمران خان ہی پاکستان کے وزیراعظم رہیں گے ۔
انہوں نے مزید کہا کہ جن اراکین اسمبلی پر سوالات اٹھ رہے ہیں ان ارکان کو چاہیے کہ اپنے قائد عمران خان سے ملاقات کریں اور جماعت سے وفاداری کی یقین دہانی کروائیں، اگر آپ نے آج اس جماعت سے وفاداری کا ثبوت نہیں دیا جس کے ٹکٹ پر آپ الیکشن لڑ کر اسمبلی میں پہنچے ہیں تو آپ کی سیاست متاثر ہوگی۔
راجا ضرار نے عوام کو پیغام دیتے ہوئے کہا کہ ملک کی تاریخ میں پہلی بار ایک ایسا لیڈر آیا ہے جو امت مسلمہ کی قیادت کی اہلیت رکھتا ہے، اس قائد کے شانہ بشانہ ہوجائیں، پاکستان زندہ باد۔
ضرار سجاد نے ٹویٹر پر اپنی عمران خان کے ساتھ ایک تصویر بھی شیئر کی جس پر تحریر تھا" کپتان میں آپ کے ساتھ ہوں"۔
واضح رہے کہ راجا ضرار سجاد کے والد راجا سجاد اکبر فیصل آبا د سے پنجاب اسمبلی کاانتخاب لڑا کرتے تھے بعد میں انہوں نے اس حلقے سے اپنےکزن راجا ریاض کو انتخاب لڑوایا ، راجا ریاض آج بھی اپنےکزن راجاسجاد کے ڈیرے پر ہی بیٹھتے ہیں، راجا ریاض کے علاوہ یہ پورا خاندان وزیراعظم عمران خان کے ساتھ ہے اور 27 مارچ کے جلسے میں بھرپور شرکت بھی کرے گا۔
Last edited by a moderator:
