نجم سیٹھی نے کہا ہے حکومت نے پاک فوج میں جنرل لیول اور اس سے اوپر کی تقرریاں وزیراعظم عمران خان کی رضامندی سے کرنے کا فیصلہ کرلیا ہے۔
نجی ٹی وی کے پروگرام میں نجم سیٹھی نے کہا کہ حکومت کے رولز آف بزنس 2010 میں تبدیل ہوئے یہ وہ رولز ہیں جس میں حکومتی عہدیداران کی درجہ بندیاں اور رپورٹنگ لائنز ، تقرر و تبادلوں کی تشریح موجود ہوتی ہے کہ کون کس افسر کو تعینات کرے گا اور کون سا افسر کس کو جوابدہ ہوگا۔
انہوں نے مزید کہا کہ اس رولز آف بزنس میں رواں برس ستمبر کے مہینے میں 14 تاریخ کو ایک تازہ ترین ترمیم کی گئی ہے جس میں کہا گیا ہے کہ " لیفٹیننٹ جنرلز اور ان سے اوپر کی سطح پر تقرریاں وزیراعظم کی منظوری اور صدر مملکت کے دستخط کے ساتھ کی جائیں گی"۔
نجم سیٹھی نے کہا کہ اس ترمیم سے رولز آف بزنس میں ان تقرریوں کے حوالے سے تکنیکی طور پر اختیار آرمی چیف کے پاس تھا جسے اب حکومت نے ایک نئی شق شامل کرکے وزیراعظم آفس کو تفویض کردیا گیا ہے۔
واضح رہے کہ گزشتہ چند روز کےدوران ملک میں آئی ایس آئی کے چیئرمین کے حوالے سے ایک گومگو کی کیفیت پائی جاتی ہے، حکومت کی جانب سے اس معاملے میں تاحال کوئی واضح فیصلہ نہیں کیا گیا ہے، تاہم خبریں ہیں کہ وزارت دفاع کی جانب سے لیفٹیننٹ جنرل ندیم انجم کو ڈی جی آئی ایس آئی بنانے کیلئے سمری وزیراعظم آفس بھجوادی گئی ہے، اس خبر کی بھی تردید کا تصدیق تاحال نہیں ہوسکی ہے۔