وفاقی حکومت نے پنجاب اور خیبر پختونخوا اسمبلی میں صوبائی حکومتوں کے خلاف تحریک عدم اعتماد لانے کا اعلان کردیا ہے۔
خبررساں ادارےکی رپورٹ کے مطابق یہ اعلان وفاقی وزیرداخلہ رانا ثناء اللہ نے اپنے ایک بیان میں سابق وزیراعظم عمران خان کی جانب سے صوبائی اسمبلیوں کی تحلیل کے اعلان کے جواب میں کیا اور کہا کہ اگر اسمبلی میں عدم اعتماد جمع ہوجائے تو اسمبلیاں تحلیل نہیں کی جاسکے گی۔
وفاقی وزیر داخلہ نے مزید کہا کہ پنجاب اسمبلی میں ہماری تعداد کافی ہے جس سے ہمیں کوئی مسئلہ نہیں ہوگا، ہم خیبر پختونخوا اسمبلی میں پی ڈی ایم حکومت کو ٹف ٹائم دے گی، اگر عمران خان کو سسٹم سے باہر کردیا گیا تو ملک میں سیاسی استحکام آجائے گا، عمران خان نے جارحانہ سیاست کی پالیسی اپنائی ہے جو ناکام ہوئی ہے۔
انہوں نے مزید کہا کہ جتنے لوگ اسلام آباد میں جمع ہوئے ہیں اس سے زیادہ اہلکار تو اسلام آباد کی حفاظت پر معمور ہیں، عمران خان کی آج کی تقریر اعتراف شکست ہے، جلسے میں عوام کی جو تعداد آئی تھی وہ سب نے دیکھ لی ہے۔
خیال رہے کہ اسلام آباد میں جلسے سے خطاب کرتے ہوئے عمران خان نے اعلان کیا کہ پاکستان تحریک انصاف کے ارکان اسمبلیوں سے مستعفیٰ ہوجائیں گے جبکہ پنجاب اور خیبر پختونخوا اسمبلیوں کو تحلیل کردیا جائے گا تاکہ وفاقی حکومت مجبور ہوکر عام انتخابات کا اعلان کرے۔