پاکستان تحریک انصاف کی کور کمیٹی میٹنگ کی اندرونی کہانی سامنے آگئی ہےجس کے مطابق وائس چیئرمین شاہ محمود قریشی و شفقت محمود کی جانب سے ضمنی انتخابات سے متعلق تجاویز مسترد کردی گئیں۔
تفصیلات کے مطابق عمران خان کی زیر صدار پی ٹی آئی کی کورکمیٹی کا اجلاس ہوا ، اجلاس میں سابق وفاقی وزیر خارجہ شاہ محمود قریشی نے ضمنی انتخابات کے حوالے سے اپنی رائے دیتے ہوئے کہا کہ ہمیں سوچنا ہوگا کہ3 ماہ کیلئےالیکشن لڑنا بھی چاہیے یا نہیں، ہمیں اس انتخاب کو لڑنے سے کیا فائدہ ہوگا؟
اس موقع پر سینئر پارٹی رہنما شفقت محمود نے ضمنی انتخابات لڑنے مگر تمام حلقوں میں عمران خان کو بطور امیدوار کھڑا کرنے کی مخالفت کرتے ہوئے تمام حلقوں میں الگ الگ امیدوار کھڑے کرنے کی تجویز دی۔
اجلاس میں پارٹی کے جنرل سیکرٹری اسد عمر نے ضمنی انتخابات میں حصہ نا لینے کی شاہ محمود قریشی کی تجویز کی مخالفت کرتے ہوئے کہا کہ سیاسی جماعتو ں کو الیکشن سے دور نہیں رہنا چاہیے، ہم الیکشن میں ضرور حصہ لیں گے۔
تمام حلقوں میں الگ الگ امیدوار کھڑا کرنے کی تجویز پر بھی پارٹی کی اکثریتی ارکان نے مخالفت کی اور کہا کہ اس سے دھڑےبندیاں ہوسکتی ہیں، عمران خان نے پارٹی کی اکثریتی رائے سننے کے بعد کہا کہ ضمنی انتخابات میں تمام حلقوں سے میں خود الیکشن لڑوں گا، ہم نے کونسا اسمبلی میں واپس جانا ہے۔
اجلاس میں قومی و صوبائی اسمبلی کے انتخابات موخر یا ملتوی کرنے سے متعلق افواہوں کا معاملہ بھی زیر غور آیا، سینیٹر علی ظفر نے کہا کہ آئینی میں قومی و صوبائی اسمبلی کے انتخابات ملتوی کرنے کی کوئی شق موجود نہیں ہے، اگر ایسا کوئی اقدام اٹھایا گیا تو قانونی چارہ جوئی کی جاسکتی ہے۔
