چیئرمین پیپلزپارٹی بلاول بھٹو زرداری کی اوآئی سی کانفرنس روکنے سے متعلق بیان پر وفاقی وزراء نے سخت ردعمل دیدیا ہے۔
مائیکروبلاگنگ ویب سائٹ ٹویٹر پر وفاقی وزیر منصوبہ بندی اسد عمر نے بلاول بھٹو کے بیان پر جواب دیتے ہوئے انہیں چیلنج دیا کہ روک سکتے ہو تو روک لو او آئی سی کانفرنس تو ضرور ہوگی۔
انہوں نے اپنے بیان میں کہا کہ بلاول زرداری ہمیں یہ تو پتہ تھا کے آپ کبھی مسلمانوں اور ان کے حقوق کے دفاع میں بات کرنے سے ڈرتے ہیں. لیکن اتنی کھلی مسلم دشمنی کے اسلامی کانفرنس روکنے کی دھمکی؟
انہوں نے مزید کہا کہ کانفرنس تو ہو گی، مسلم امہ کی یکجہتی کا اظہارِ بھی ہو گا، اور دنیا بھی دیکھے گی. روک سکو تو روک لو۔
دوسری جانب وفاقی وزیر خارجہ شاہ محمود قریشی نے کہا امید ہے بلاول بھٹو بھارتی آلہ کارنہیں بنیں گے اور کانفرنس کو سبوتاژ نہیں کریں گے۔
شاہ محمود قریشی نے بلاول بھٹو زرداری کے بیان کو بوکھلاہٹ اور ناسمجھی قرار دیا اور کہا کہ اگر اپوزیشن کے پاس تعداد پوری ہےتوانہیں پریشان ہونے کی کیا ضرورت ہے، انہیں تو پراعتماد ہونا چاہیے اور ہمیں پریشان ہونا چاہیے مگر یہاں تو ان کے چہروں پر پریشانی کے آثار نظر آرہے ہیں۔
انہوں نے مزید کہا کہ ہم کسی بھی صورت میں تصادم نہیں چاہتے اور عدم اعتماد کا مقابلہ جمہوری و سیاسی طریقے سے کرنا چاہتے ہیں، حکومت کسی بھی رکن اسمبلی کیلئے کوئی رکاوٹ کھڑی نہیں کرے گی ہم اپنے منحرف ارکان کومنانے کی کوشش کریں گے۔
وفاقی وزیر نے کہا کہ ہر رکن اسمبلی کو اپنے ضمیر کے مطابق ووٹ دینےکا حق ہے اس لیے ہم کسی پر زبردستی نہیں کریں گے، او آئی سی اجلاس پہلے سے طے تھا اس کانفرنس کیلئے مختلف ملکوں کے وزرائےخارجہ تشریف لارہےہیں ، ایسی صورتحال میں یہ دھمکی دی جارہی ہے۔
انہوں نے کہا کہ ایک طرف مولانا نے اوآئی سی کیلئے اپنا احتجاج موخر کیا تو انہوں نے دھرنا دینے کا اعلان کردیا، یہ ناسمجھی ہے ان کے بڑوں کو چاہیےکہ انہیں سمجھایا جائے، او آئی سی کانفرنس اس حکومت کا نہیں بلکہ ریاست اور ملکی ساکھ کا مسئلہ ہے اور بھارت اس کانفرنس کو سبوتاژ کرنا چاہتا ہے ہمیں امید ہے بلاول بھارت کے آلہ کار نہیں بنیں گے۔
وزیراعظم عمران خان کے معاون خصوصی ڈاکٹر شہباز گل نے کہا انکا بغض عمران اب بغض پاکستان میں بدل چکا ہے، ہمیں پتا تھا کہ چیئرمین سیاسی طور پر نابالغ ہے مگر وہ اس قدر امیچیور ہے اس کا اندازہ نہیں تھا۔
انہوں نے مزید کہا کہ جو ان کے پیچھے ہاتھ باندھے کھڑے ہیں تمام عمر سیاست میں بال سفید کرنے والے انہیں چاہیے کہ انکو سمجھائیں اور عقل کے ناخن لیں کہ ان کے آباؤ اجداد پہلے بھی ملک توڑ چکے ہیں، یہ عمران خان کی نہیں پاکستان کی او آئی سی ہے۔
ڈاکٹر شہباز گل نے کہا کہ پاکستان اسلامی دنیا کو متحد کرنے میں اپنا کردار ادا کر رہا ہے اور ذرا سوچیئے کہ یہ لوگ کس کے ایجنڈے کے تحت اس کام میں رکاوٹیں ڈال رہے ہیں۔
