اے وطن کے سجیلے جوانو
سارے جنگلات تمہارے لئے ہیں
ابھی ابھی خبر آئی ہے کہ حکومتِ سندھ نے فوج کو 9600 ایکڑ جنگلات کی زمین دینے کی منظوری دے دی ہے، تو اس طرح ہمارے فوجی جرنیل اپنے جوانوں کی قربانیوں کی قیمت لے رہے ہیں، اگرچہ یہ اس ملک میں کوئی نیا کھیل نہیں، ہمارے بانکے سجیلے جرنیل شہید فوجیوں کی لاشیں دکھا کر اس قوم سے بڑے عرصے سے بھتہ وصول کرتے آئے ہیں اور اب تک کررہے ہیں، وہ فوجی جوان جن کو اس بھتے میں سے کچھ نہیں ملنا ہوتا، جن کی قربانیوں کی بدولت ہم آزاد فضاء میں سانس لینے کے قابل ہیں، انہی جوانوں کی میتوں کا ٹیکس یہ ہم سے وصول کرتے ہیں، اپنے بھتے کے لئے سیاستدانوں کے ساتھ ہونے والی لڑائی کو یہ قومی جنگ بنا کر پیش کرتے ہیں اور عوام کو بے وقوف بناتے ہیں۔
ہم یہ پوچھنا چاہتے ہیں کہ فوج کو یہ زمین کس لئے چاہئے؟ کیا وہاں پر چڑیا گھر کھولنے کا ارادہ ہے، یا جنگلات کا صفایا کرکے جرنیلوں کی سرکس کھولی جائے گی؟ آخر کیا کرنا ہے فوج نے اتنی زمین کا؟ اور فوج کا کیا حق ہے اس زمین پر؟ کیا جرنیلوں کی عیاشیوں کے لئے زمین کم پڑنے لگی ہے جو اب جنگلات کی طرف رخ کرلیا ہے، ۔ کیا وزیرستان آپریشن کے نام پر اب جرنیل اپنی بینک اکاؤنٹس بھریں گے،؟
اگرچہ ہمیں فوج سے کبھی بھی امید نہیں رہی کہ وہ اس ملک کو کرپٹ سیاسی چوروں سے نجات دلائیں گے، مگر جب سے جنرل راحیل شریف نے فوج کی کمان سنبھالی ہے، وزیرستان میں آپریشن شروع کیا، کراچی میں بھی کسی حد تک گند کو صاف کیا، سیاستدانوں کو ان کی اوقات پر لے کر آئے، ان کے ان اقدامات سے قوم نے امید بھری نظروں سے جنرل راحیل کی طرف دیکھنا شروع کردیا کہ شاید اب تبدیلی آرہی ہے، گند کا صفایا ہونے والا ہے، مگر یہ تازہ ترین خبر کچھ اور ہی خبر دے رہی ہے، یہ تو جرنیلوں اور سیاستدانوں کی بھتے پر لڑائی ہوگئی ہے، اور ہمیشہ کی طرح سیاستدانوں نے سر جھکا کر بھتہ جرنیلوں کو پیش کردیا ہے۔ کیا خوب کھیل کھیلا ہمارے بہادر جوانوں میں۔
جنرل راحیل شریف اگر آپ بھی اپنے پیش روؤں کی صف میں کھڑے ہونا چاہتے ہیں تو ہمیں کوئی تعجب نہیں ہوگا کہ ہر فوجی سربراہ ہمیشہ یہی کرتا آیا ہے، لیکن قوم آپ کی طرف دیکھ رہی ہے، اس زمین کی وضاحت مانگ رہی ہے، کیا زرداری کی چوری چکاریوں پر سود ا ہوچکا ہے ؟ اس کا جواب مانگ رہی ہے۔
News Source: http://www.siasat.pk/forum/showthre...d-Land-for-Army-Now-Zardari-will-be-Patriotic