الیکشن کمیشن آف پاکستان نے 9 اکتوبر کو مختلف حلقوں میں ہونے والے ضمنی انتخابا ت کی تاریخ تبدیل کردی ہے، فیصلہ 9 اکتوبر کو متوقع طور پر 12 ربیع الاول ہونے کی وجہ سے کیا گیا ہے۔
الیکشن کمیشن آف پاکستان کی جانب سے جاری کردہ پریس ریلیز میں کہا گیا ہے کہ چیف الیکشن کمشنر سکندر سلطان راجہ کی زیر صدارت الیکشن کمیشن کا اجلاس ہوا جس میں 9 اکتوبر کو این اے157 ملتان، پی پی 139 شیخوپورہ، پی پی209 خانیوال اور پی پی241 بہاولنگر میں ضمنی انتخابات کیلئے پولنگ سے متعلق معاملہ زیر غور آیا۔
اجلاس میں الیکشن کمیشن کو بتایا گیا کہ اس دن متوقع طور پر 12 ربیع الاول ہوگی جو کہ عید میلاد النبی کا دن ہے، لاہور ہائی کورٹ کے ملتان بینچ نے بھی ایک کیس کی سماعت کے دوران الیکشن کمیشن سےتاریخ تبدیلی کا کہا ہے۔
الیکشن کمیشن نے عید میلاد النبی کی متوقع تاریخ اور ووٹروں کی سہولت کو مدنظر رکھتے ہوئے یہ فیصلہ کیا ہے کہ ان حلقہ جات میں پولنگ 9 اکتوبر کے بجائے16 اکتوبر بروز اتوار کو منعقد کی جائے گی۔
الیکشن کمیشن کے اجلاس میں قومی اسمبلی کے 9 حلقوں میں ضمنی انتخابات کیلئے پولنگ بھی 16اکتوبر کو کروانے کا فیصلہ کیا گیا ہے، جبکہ کراچی ڈویژن کے تمام اضلاع میں پولنگ 23 اکتوبر 2022 کو ہوگی۔
اجلاس میں فیصلہ کیا گیا کہ حیدرآباد ڈویژن کے اضلاع کے حوالےسے صوبائی حکومت اور صوبائی الیکشن کمشنر سندھ سے رپورٹ طلب جارہی ہے جس کی روشنی میں ان حلقوں میں پولنگ کا فیصلہ کیا جائےگا۔
