مسلم لیگ ن کی نائب صدر مریم نواز شریف نے کہا ہے کہ حکومت اپنے اراکین کونااہلی اور گھیراؤکی دھمکیاں دےرہی ہے۔
مائیکروبلاگنگ ویب سائٹ ٹویٹر پراپنے پیغام میں مریم نواز کا کہنا تھا کہ ایسی حکومت کا کیا فائدہ جس میں اپنے ہی اراکین کو نااہلی اور گھیراو کی دھمکیاں دے کر زبردستی ساتھ رکھنے کی سر توڑ کوششوں کے باوجود ناکامی کا سامنا کرنا پڑ رہا ہو۔
انہوں نے مزید کہا کہ ایسی حکومت کاکیا فائدہ جہاں اتحادیوں کے سامنے گھٹنے ٹیکنے کے بعد بھی آپ پسپا ہو رہےہوں؟ یہ حکومت نہیں ذلت ہے، شرمندگی ہے!
ن لیگی رہنما نے کہا کہ آج مجھے وہ الفاظ یاد آ رہے ہیں جو آپ نے ہزارہ برادری کو کہے تھے جو اپنے پیاروں کی لاشیں اپنے سامنے رکھ کر سردی میں دھرنا دیے بیٹھے تھے اور آپ کو پکار رہے تھے اور آپ نے کہا تھا کہ ”میں بلیک میل نہیں ہوں گا!“۔
مریم نواز نے کہا کہ ان مظلوموں کی وہ آہیں اب آپ کا پیچھا کر رہی ہیں!۔
مریم نواز نے دوسری ٹویٹ میں علامہ اقبال کا مشہور شعر لکھا:
"اے طائرِ لاہوتی! اس رزق سے موت اچھی،
جس رزق سے آتی ہو پرواز میں کوتاہی!"
اس شعر کے ساتھ انہوں نے عمران خان کو ٹیگ کیا اور کہا کہ یہ ایک عزت والےانسان کیلئے ہے آپ کیلئے نہیں۔
مریم نواز شریف کی ان ٹویٹس پر ایک صارف نے انہیں مشورہ دیا کہ آپ اپنی ٹویٹس میں عمران خان کو ٹیگ نہ کیا کریں اور انہیں اہمیت نہ دیا کریں،آپ کی مہربانی ہوگی۔
مریم نواز نے اس ٹویٹ پرردعمل دیتے ہوئے کہا کہ کسی کو مخلصانہ مشورہ دینا کوئی بری بات نہیں ہے۔