سابق وفاقی وزیر فواد چودھری کا کہنا ہے کہ اسحاق ڈار کے متضاد بیانات نے آئی ایم ایف پروگرام پر مزید پیچیدگیاں پیدا کردیں، یہ حکومت تاریخ کی سب سے احمق ٹیم پر مشتمل ہے۔
تفصیلات کے مطابق رہنما تحریک انصاف فواد چودھری کا کہنا ہے کہ حکومتی معاشی ٹیم الجھن کا شکار ہے، جس کے باعث ان کی سیاست دفن ہو چکی ہے۔ انہوں نے کہا کہ یہ تاریخ کی سب سے احمق ٹیم پر مشتمل حکومت ہے۔
اپنے جاری کردہ بیان میں سابق وزیر اطلاعات فواد چودھری کا کہنا تھا کہ کابینہ میں شامل آدھے وزرا کے پاس تو کوئی محکمہ بھی نہیں ہے اور جن کے پاس ہے ان کو کام کرنا نہیں آتا، یہی وجہ ہے کہ ابھی تک ان سے ایک ڈیش بورڈ نہیں بن سکا۔
ان کا یہ بھی کہنا تھا کہ سب سے مہارت کے ساتھ بس ایک کام جاری ہے کہ نیب کیسز کو کیسے ختم کرنا ہے۔ اپنی چوریاں اور ڈکیتیاں چھپانے کیلئے کیسز کنارے لگائے جا رہے ہیں دھڑادھڑ ان کی اپنی بریتیں ہو رہی ہیں۔
