آرمی چیف جنرل عاصم منیر نے مسیحی برادری کے وفد سے گفتگو کرتے ہوئے کہا ہے کہ اسلام امن کا مذہب ہے، کسی کو قانون اپنے ہاتھ میں لینے کی اجازت نہیں دیں گے۔
پاک فوج کے شعبہ تعلقات عامہ(آئی ایس پی آر) کی جانب سے جاری کردہ پریس ریلیز کے مطابق آرمی چیف جنرل عاصم منیر سے مسیحی برادری کے وفد نے ملاقات کی، 13 رکنی وفد کی قیادت صدر بشپ چرچ آف پاکستان اور بشپ آف رائیونڈ ڈاکٹر عازد مارشل نے کی۔
ملاقات میں باہمی دلچسپی ، بین االمذاہب ہم آہنگی، مذہبی و دیگر امور پر تبادلہ خیال کیا گیا، اس موقع پر آرمی چیف نے ملکی ترقی ووطن کے دفاع میں مسیحی برادری کے کردار کو سراہااور معیاری صحت، تعلیم کے فروغ اور خیراتی اداروں کی خدمات کی تعریف کی۔
ترجمان پاک فوج کے مطابق اجلاس میں مسیحی برادری نے دہشت گردی کے خلاف پاک فوج کی کوششوں کو سراہتے ہوئے ملک میں اقلیتوں کو محفوظ ماحول فراہم کرنے پر پاک فوج کے کردار کو تسلیم ، معاشرےمیں برداشت کے فروغ میں کردار کرنے پر آرمی چیف کی تعریف کی اور آرمی چیف کے جذبے کواقلیتوں کیلئے قابل دید قرار دیا۔
آرمی چیف جنرل عاصم منیر کا اس موقع پر کہنا تھا کہ کسی بھی مہذب معاشرے میں کسی کو بھی قانون اپنے ہاتھ میں لینے کی اجازت نہیں ہوتی، اسلام امن کامذہب ہے ، عدم برداشت اور انتہاپسندی کی اسلام میں کوئی گنجائش نہیں، قائداعظم محمد علی جناح کےترقی یافتہ اور متحد پاکستان کی سوچ پر عمل پیرا ہونے کیلئے تمام مذاہب کے درمیان ہم آہنگی ضروری ہے
