لیگی رہنمائوں کی سپریم کورٹ مخالف دشنام ترازی پر سپریم کورٹ حملے کے عینی شاہد صحافی پریشان ہیں، نہ بھولیں اسی سپریم کورٹ کے فیصلے سے عمران خان کا اقتدار ختم ہوا اور آپ کو حکومت ملی!: سینئر صحافی
سینئر صحافی وتجزیہ کار کامران خان نے دی ورلڈ ٹوڈے کی 1997ء میں مسلم لیگ ن کے کارکنوں کے سپریم کورٹ پر حملے کے مناظر اور واقعات کی رپورٹ شیئر کرتے ہوئے اپنے پیغام میں لکھا کہ: مجھ سمیت بہت سے صحافی جو 28 نومبر 1997 ء کو ن لیگ کے سپریم کورٹ پر بھیانک حملے کےعینی شاہد ہیں، گزشتہ 2 روز سے حکومتی جماعتوں بالخصوص ن لیگی رہنماؤں کی سپریم کورٹ مخالف گفتگو دشنام ترازی پر یقیناً بہت پریشان ہیں! نہ بھولیں اسی سپریم کورٹ کے فیصلے سے عمران خان کا اقتدار ختم ہوا اور آپ کو حکومت ملی!
انہوں نے لکھا کہ: غور سے دیکھتے رہیے مسلم لیگ ن کی حکومت سپریم کورٹ سے ایک اور پنجہ آزمائی کرنے جارہی ہے! سپریم کورٹ سے وہ ہی شکایتیں جو 1997ء میں بھی تھیں وہ ہی غصہ، وہی سپریم کورٹ کو زیر کرنے کا عزم، سپریم کورٹ پر بھیانک حملے کے مناظر بھولے نہیں بھولتے!
ایک اور ٹویٹر پیغام میں 28 نومبر کے حوالے سے خبر کا تراشہ شیئر کرتے ہوئے لکھا کہ: 28 نومبر 1997 ء تاریخِ پاکستان کا وہ سیاہ ترین دن جب پاکستان مسلم لیگ ن کے رہنماؤں وکارکنوں نےمنصوبہ بندی سے سپریم کورٹ آف پاکستان پر حملہ کردیا تھا! چیف جسٹس آف پاکستان کو عدالت عظمیٰ ججز کی حفاظت کے لئے فوج کو طلب کرنا پڑا! آج مجھے ن لیگی لیڈرشپ کا سپریم کورٹ حوالے سے لب و لہجہ سن کر خوف آرہا تھا!
دریں اثنا وفاقی وزیر قانون اعظم نذیر تارڑ نے عدالتی اصلاحات کے حوالے سے سپریم کورٹ پریکٹس اینڈ پروسیجر بل 2023ء قومی اسمبلی میں پیش کر دیا ہے۔ وفاقی وزیر قانون کا کہنا تھا کہ ہم نےوہ دور بھی دیکھا جب ہسپتال میں پارکنگ سہولیات پر سوموٹو نوٹس لیے گئے۔ سپریم کورٹ رولز کے مطابق سوموٹو اختیار چیف جسٹس کے پاس ہے لیکن فرد واحد نے ماضی میں اس اختیار کو استعمال کرتے ہوئے ادارے کی ساکھ کو نقصان پہنچایا۔
