وزارت ہوابازی نے ڈرون کیمروں کی سول ایو ی ایشن میں رجسٹریشن کو لازمی قرار دیدیا ہے۔
تفصیلات کے مطابق وزارت ہوابازی نے ڈرون کیمروں کے حوالے سے پالیسی رولز جاری کردیئے ہیں، رولز کے مطابق ڈرون کیمرے رکھنے والے شہری سول ایوی ایشن اتھارٹی سے رجسٹریشن کروائیں۔
رولز کے مطابق 4 ماہ میں ڈرون کیمرے رکھنے والوں کو رجسٹریشن کروانا لازمی قرار دیدیا گیا ہے، رجسٹریشن کروانے والوں کو "ریموٹ پائلٹ لائسنس " جاری کیا جائے گا، اس لائسنس کی معیاد 3 سال ہوگی، ڈرون کیمروں کی بارڈر اور ممنوعہ علاقوں میں اڑان پر مکمل طور پر پابندی ہوگی۔
رولز میں کہا گیا ہے کہ ہوائی اڈوں کی 6 کلومیٹرکی حدود میں ڈرون کو اڑانے پر پابندی ہوگی، ڈرون کیمروں کے حادثات کی صورت میں سول ایوی ایشن اتھارٹی کو آگاہ کرنا لازمی ہوگا،ڈرونز کی سول ایوی ایشن کے انسپکٹرز سے انسپکشن بھی لازمی ہوگی ، انسپکشن کے بغیر ڈرون کو اڑانے کی اجازت نہیں دی جائے گی، رولز کی خلاف ورزی پر ڈرون رکھنے والوں کے خلاف کارروائی ہوگی۔
رولز کے مطابق ڈرون کیمروں کو وزن کے اعتبار سے 4 مختلف کیٹیگریز میں تقسیم کیا گیا ہے،ان کیٹیگریز میں شامل ڈرون کیمروں کی درآمد و برآمد کی بھی اجازت ہوگی، تاہم ڈرون کیمروں کی درآمد کیلئے وزارت دفاع سے کلیرئنس لینا لازمی ہوگا۔
وزارت ہوابازی کا کہنا ہے کہ ڈرونز پالیسی کے حوالے سے حکومتی سطح پرسیکرٹری داخلہ کی سربراہی میں ایک کوآرڈینیشن کمیٹی قائم ہوگی جس میں ڈی جی ایئر پورٹس اتھارٹی سمیت دیگر اداروں کے سربراہ شامل ہوں ، ڈرون رولز میں تبدیلی یا ترمیم کیلئے وزیراعظم سے منظوری لینا لازمی ہوگا۔
- Featured Thumbs
- https://www.siasat.pk/data/files/s3/4dronnereggsgs.png
