اسٹاک مارکیٹ میں ایک طرف تیزی دیکھی گئی مگر روپے کی قدر میں کمی ریکارڈ کی گئی ہے۔
ملک میں معاشی سرگرمیوں میں ملا جلا رجحان دیکھا گیا ہے، ایک طرف اسٹاک مارکیٹ میں تیزی دیکھی گئی تو دوسری جانب انٹربینک میں روپے کی قدر میں کمی واقع ہوئی ہے۔
مائیکرو بلاگنگ ویب سائٹ ٹویٹر پر اسٹیٹ بینک آف پاکستان کی جانب سے جاری کردہ اعدادوشمار کے مطابق آج انٹربینک میں امریکی ڈالر کے مقابلے میں روپے کی قدر میں صفر اعشاریہ صفر 1 فیصد کمی واقع ہوئی ہے۔
اسٹیٹ بینک کے مطابق جو ڈالر گزشتہ کاروباری ہفتے کے آخری روز 176 روپے 67 پیسے میں فروخت ہورہا تھا آج ایک پیسا مہنگا ہونے کے بعد 176 روپے 68 پیسے میں فروخت ہوا۔
دوسری جانب اسٹاک مارکیٹ میں کاروباری ہفتے کا آغاز مثبت ہوا اور اسٹاک مارکیٹ میں 541 اعشاریہ 98 پوائنٹس کا اضافہ ہوا۔
ایک موقع پر اسٹاک مارکیٹ کی ہنڈرڈ انڈیکس45 ہزار967 کی حد تک بھی پہنچ گئی تھی تاہم کاروبار کے اختتام تک یہ حد برقرار نہ رہ سکی اور ہنڈرڈ انڈیکس45ہزار887اعشاریہ63 پوائنٹس کی سطح پر بند ہوا۔
