ملک میں جرائم کا خاتمہ کرنے کے لیے بنائے گئے اداروں کے افسران ہی جب جرائم کی معاونت کرنے لگیں تو بہتری کیسے آ سکتی ہے؟ نجی ٹی وی چینل اے آر وائے نیوز کے پروگرام سرعام کے میزبان اقرار الحسن نے اینٹی کار لفٹنگ سیل کراچی کے دفتر میں ایک سٹنگ آپریشن کیا جس میں چوری کی موٹرسائیکلیں فروخت کرنے والا ڈی ایس پی رنگے ہاتھوں پکڑ لیا گیا۔ ملزم اینٹی کار لفٹنگ سیل ایسٹ میں ذمہ داریاں سرانجام دے رہا تھا۔
نجابت حسین نامی ڈی ایس پی کے خلاف مختلف شہریوں کی طرف سے شکایات موصول ہوئی تھی جس پر سٹنگ آپریشن کیا گیا، ڈی ایس پی اے وی ایل سی ایسٹ شہریوں کی چوری ہونے والی موٹرسائیکلیں برآمد ہونے کے بعد فروخت کر دیتا تھا۔ چوری کے بعد برآمد کی گئی موٹرسائیکلوں کی اطلاع اصل مالک کو دینے کے بجائے وہ کم قیمت پر فروخت کر دیتا تھا۔
سرعام کی ٹیم کو چوری کے بعد برآمد کی گئی ایک موٹرسائیکل 15 ہزار روپے میں جبکہ دوسری دفعہ 20 ہزار روپے میں فروخت کی گئی، ٹیم سرعام نے موٹرسائیکلیں فروخت کرنے کی ڈیلز اور فروخت کے حوالے سے تمام گفتگو کو ریکارڈ کر لیا تھا اور سٹنگ آپریشن سے پہلے تمام ثبوت جمع کیے تھے۔
پروگرام کے میزبان اقرار الحسن کا کہنا تھا کہ ہم نے اپنے محدود بجٹ میں یہ پروگرام کیا تو چوری کی موٹرسائیکل خرید سکے ورنہ تو ڈی ایس پی نجابت حسین چوری کے بعد برآمد ہونے والی گاڑیوں کی فروخت میں بھی ملوث ہے۔ پروگرام سرعام کے اینکر کی ایس ایس پی اے وی ایل سی عارف اسلم رائو سے بھی گفتگو ہوئی جس میں انہوں نے کرپٹ افسران کیخلاف کارروائی کی یقین دہانی کروائی ہے۔
اقرار الحسن کا کہنا تھا کہ اینٹی کار لفٹنگ سیل اس مقصد کے لیے قائم کیا گیا تھا کہ چوری شدہ موٹرسائیکلیں اور گاڑیاں ان کے مالکان کو لوٹائی جائیں لیکن یہ افسر وہاں پر اپنی دکان کھول کر بیٹھا ہوا ہے۔ انہوں نے کہا کہ ہمارے پاس ان کے پیسے لینے کی ویڈیوز بھی موجود ہیں جنہیں جھٹلایا نہیں جا سکتا تاہم ڈی ایس پی نجابت حسین قرآن پاک کی قسمیں کھا کر جھوٹ بولتا رہا۔
- Featured Thumbs
- https://www.siasat.pk/data/files/s3/13sisnnsdssnjababt.png
