وزیراعلی پنجاب چوہدری پرویز الہیٰ کی جانب سے چیئرمین پاکستان تحریک انصاف عمران خان کو اسمبلیوں کی مدت پوری کرنے کا مشورہ دینے کا امکان سامنےآیا ہے۔
خبررساں ادارے ہم نیوز کی رپورٹ میں دعویٰ کیا گیا ہے کہ عمران خان کی اتحادی جماعت ق لیگ کے رہنما اور وزیراعلی پنجاب چوہدری پرویز الہیٰ عمران خان کی جانب سے اسمبلیوں کے تحلیل کرنے کے فیصلے پر رضامند نہیں ہیں اور وہ اس فیصلے سے اختلاف رکھتے ہیں۔
رپورٹ میں دعویٰ کیا گیا ہے کہ آئندہ 24 گھنٹوں کے دوران وزیراعلی پنجاب کی عمران خان سے اہم ملاقات کی توقع کی جارہی ہے جس میں چوہدری پرویز الہیٰ عمران خان اسمبلیوں کی مدت پوری کروانے کا مشورہ دیں گے، اس ملاقات کیلئے چوہدری پرویز الہیٰ لاہور پہنچ گئے ہیں، ترجمان وزیراعلی پنجاب کے مطابق دونوں رہنماؤں کے درمیان یہ اہم ملاقات متوقع ہے۔
ذرائع کا کہنا ہے کہ چوہدری پرویز الہیٰ کا موقف ہے کہ صوبے میں شروع کیے جانے والے ترقیاتی کاموں کو انتخابات سے قبل مکمل ہونا چاہیے، منصوبوں کو ادھورا چھوڑنے کا نقصان ہوسکتا ہے، تاہم اگر حکومت مدت پوری کرے اور اپنے شروع کردہ منصوبوں کو بھی مکمل کرلے تو اس کا فائدہ پی ٹی آئی کو پہنچ سکتا ہے۔
تاہم ذرائع کا کہنا ہے کہ اگرتجویز دینے اور عمران خان کو قائل کرنے کی کوشش کرنے کے باوجود اگر عمران خان چوہدری پرویز الہیٰ کے مشورے پر رضامند نہیں ہوئے تو وزیراعلی اسمبلی تحلیل کرنے سے متعلق عمران خان کے فیصلے پر عملدرآمد کریں گے۔