نگراں وزیر اطلاعات پنجاب عامر میرکی جانب سے پختونوں کو دہشتگرد قرار دینے کی کوشش پر سوشل میڈیا صارفین سراپا احتجاج بن گئے۔
تفصیلات کے مطابق نگراں وزیر اطلاعات پنجاب عامر میر نے ایک پریس کانفرنس کے دوران گفتگو کرتے ہوئے کہا کہ ہمارے پاس ایسی اطلاعات بھی ہیں جن کے مطابق خیبر پختونخوا سے بھی کچھ لوگ یہاں ہیں جو دہشت گرد ہیں، ان میں ایک شخص کے نام کی تصدیق بھی ہوچکی ہے جو تحریک نفاذ شریعت محمدی سے تعلق رکھتا ہے۔
عامر میر کی جانب سے پختونوں سے متعلق اس بیان پر سوشل میڈیا صارفین نے انہیں آڑے ہاتھوں لیا اور محب وطن پختونوں سے فوری طور پر معافی مانگنے کا مطالبہ کیا۔
سابق وزیراعظم عمران خان کے معاون خصوصی رہنے والے ڈاکٹر افتخار درانی نے عامر میر کے بیان پر سخت ردعمل دیتے ہوئے کہا کہ عامر میر یہ بیان فوری طور پر واپس لیں، ملک پہلے ہی کئی مسائل کا شکار ہے اسے مزید تفریق پیدا کرکے انارکی کی جانب مت دھکیلیں، عامر میر کے الفاظ ان کی تعصبی سوچ کی عکاس ہے۔
سابق صوبائی وزیر اور رہنما تحریک انصاف ڈاکٹر ارسلان خالد نے کہا کہ حکومت الیکشن منسوخ کروانے کیلئے خواہ مخوان لوگوں کو اشتعال دلارہی ہے، جس شخص کے بارے میں بات ہورہی ہے اسے جیل سے چھوڑا گیا، وہ ایک عرصے سے آزاد شہری کی طرح زندگی گزاررہا ہے، اب زمان پارک آنے کی وجہ سے وہ دوبارہ دہشت گرد ہوگیا؟
انوار لودھی نے عامر میر کے بیان کو شرمناک کہتے ہوئے ان سے معافی مانگنے کا مطالبہ کیاہے۔
رضوان غلزئی نے کہا کہ پختونوں کو دہشت گرد کہہ کر عامر میر نے پورے خیبر پختونخوا کی توہین کی ہے، اس غیر ذمہ دارانہ بیان پر عامر میر فوری طور پر معافی مانگیں۔
وقاص امجد نامی صارف نے کہا کہ ہم عامر میر کی جانب سےخیبر پختونخوا سے آئے بھائیوں کو دہشت گرد کہنے کی مذمت کرتے ہیں، پشتون ساتھی ہمارا مان ہیں۔
احمد بیگ نے کہا کہ پہلے وفاقی وزیر سعد رفیق نے کہا کہ گلگت بلتستان کے آئی جی اور وزیراعلی و دیگر لوگوں پر بغاوت کے مقدمات ہونے چاہیے، اب عامر میر پشتونوں کو دہشت گرد قرار دے رہے ہیں۔
احمد بیگ نےکہا کہ یہ کیسے بدبخت ہیں، کیا یہ بھارتی ایجنڈے کے تحت ملک کو خدانخواستہ توڑنا چاہتے ہیں، یہ لوگ ہر طرف نفرتیں پھیلارہے ہیں۔
ارم ضعیم نے کہا کہ یہ لاہور میں بیٹھ کر پاکستان ک تقسیم کررہے ہیں، جب تک یہ اپنے بیان پر معافی نہیں مانگتے ان کا بائیکاٹ کیا جائے۔
ایک اور صارف نے کہا کہ حامد میر کے بھائی عامر میر نے تمام پشتونوں کو دہشت گرد قرار دیدیا، میں خود پشتون نہیں ہوں مگر ہمارے بھائیوں کو کوئی دہشت گرد قرار نہیں دے سکتا، عامر میر فوری طور پر اپنے بیان پر معافی مانگ کر عہدے سے استعفیٰ دیں۔
- Featured Thumbs
- https://www.siasat.pk/data/files/s3/pakhtonaasha.jpg
