پاکستان تحریک انصاف کے رہنماؤں نے منحرف رہنما عثمان ڈار کے انٹرویو پر ردعمل دیتے ہوئے اسے سکرپٹڈ قرار دیدیا ہے۔
تفصیلات کے مطابق پاکستان تحریک انصاف کے منحرف رہنما عثمان ڈار نے دنیا نیوز کے پروگرام آن دی فرنٹ میں میزبان کامران شاہد کو انٹرویو دیتے ہوئے پاکستان تحریک انصا ف چھوڑنے کا اعلان کرتے ہوئے 9 مئی کے واقعات کی پرزور مذمت کی ہے اور ان واقعات کی ذمہ داری چیئرمین عمران خان پر ڈالی ہے۔
پاکستان تحریک انصا ف کے رہنماؤں نے سابقہ ساتھی عثمان ڈار کے انکشافات او ر الزامات پرردعمل دیتے ہوئے اس انٹرویو کو سکرپٹڈ اور جبر کے تحت دیا گیا انٹرویو قرار دیدیا ہے۔
پاکستان تحریک انصاف کے سیکرٹری جنرل حماد اظہر نے اس پریس کانفرنس پر ردعمل دیتے ہوئے کہا کہ جبری پریس کانفرنس کا فارمیٹ بدل دیا گیا ہے،اغواء یا گرفتار ہوا قیدی رہائی کے بعد کسی اینکر کے ساتھ گھر پر بیٹھے گا، سکرپٹ وہی پرانا ہے، ہم نہیں جانتے کہ عثمان ڈار کے ساتھ پچھلے دو ہفتوں میں کیا بیتی ہوگی،ان پر کس کس قسم کے حربوں کا استعمال کیا گیا ہوگا۔
حماد اظہر نے دوسری ٹویٹ میں کہا کہ کیا انسانیت ہے کہ دو ہفتوں سے تشدد ہراسانی اور اغوا کا شکار ایک شخص کا سکرپٹڈ انٹرویو ٹی وی پر نشر کیا جارہا ہے، کیا ہم عوام کو اتنا بہرہ سمجھتے ہیں کہ وہ اس گھٹیا سازش کو نا دیکھ پائیں؟
سابق ڈپٹی اسپیکر قاسم سوری نے کہا کہ خاندان کے لوگوں کو ڈرا دھمکا کے، زور زبردستی، ظلم وتشدد یا کاروبار بند کرکے وفاداریاں تبدیل کروانے کا سلسلہ بند ہونا چاہیے، عمران خان پاکستان ہیں اور پاکستان عمران خان ہیں، ایسے اقدامات سے پی ٹی آئی کمزور ہونے کے بجائے مزید مضبو ط ہورہی ہے۔
رہنما پی ٹی آئی حافظ فرحت عباس نے کہا کہ کون اس شخص کے اعترافی بیان پر یقین کرے گا جو لاپتہ یا اغوا ہے، عدالتیں ایسے بیانات کو آسانی سے مسترد کردیتی ہیں، ایسے بیانات کی قسمت کا فیصلہ عام انتخابات میں عوام کریں گے۔
حافظ فرحت عباس نے مزید کہا کہ پی ٹی آئی رہنماؤں کو اغوا کرکے، تشدد کا نشانہ بنا کے، وفاداریاں تبدیل کرکے عمران خان کے خلاف دلوائے گئے بیانات کو کوئی بھی قبول نہیں کرے گا، ہم عثمان ڈا ر اور ان کی فیملی کا کرب سمجھ سکتے ہیں۔
صحافی زبیر علی خان نے کہا کہ پریس کانفرنس سے شروع ہونے والا سلسلہ اب ٹی وی انٹرویو ز تک پہنچ گیا ہے، عثمان ڈار کا انٹرویو بھی اسی سلسلے کی ایک کڑی ہے، مزید رہنماؤں پر بھی دباؤ ڈالا جارہا ہے۔
احمد حسن بوبک نے کہا کہ کن پٹی پر خفیہ بندوق اور ماؤں بہنوں کی عزتیں داؤ پر لگی ہوں تو اکثر زبان دشمن کے ماتحت ہوجاتی ہے۔
