بھارتی میڈیا کے مطابق حکمران جماعت بھارتیہ جنتا پارٹی کے رکن پارلیمنٹ جو کہ ریسلنگ فیڈریشن کے صدر بھی ہیں انہوں نے اسٹیج پر آکر درخواست کرنے والے نوجوان ریسلر کو تھپڑ مار دیا جس پر انہیں شدید تنقید کا سامنا ہے۔
تفصیلات کے مطابق بھارتی ریاست جھارکھنڈ میں نیشنل ریسلنگ چیمپئن شپ کی تقریب جاری تھی جس میں بی جے پی رکن پارلیمنٹ برج بھوشن شرن سنگھ بطور مہمان خصوصی تقریب میں شریک تھے۔
تقریب کے دوران اوور ویٹ ہونے کے سبب ریسلنگ مقابلے سے باہر ہو جانے والے ریسلر نے اسٹیج پر جا کر برج بھوشن شرن سنگھ سے درخواست کی کہ مجھے مقابلے میں شامل کیا جائے۔ بی جے پی رکن اسمبلی کو نوجوان ریسلر کا اسٹیج پر آکر اصرار کرنا بالکل پسند نہ آیا اور انہوں نے اسے تھپڑ دے مارا۔
ویڈیو میں دیکھا جا سکتا ہے کہ اس کے بعد اسٹیج پر موجود دیگر مہمانوں نے نوجوان ریسلر کو اسٹیج سے نیچے اتار دیا۔ سوشل میڈیا پر بی جے پی رکن پارلیمنٹ کی جانب سے نوجوان ریسلر کو تھپڑ مارنے کی شدید مذمت کی گئی۔
صارفین نے بی جے پی رہنما کے تھپڑ مارنے کے عمل کو "طاقت کا گھمنڈ" قرار دیا اور اس کی شدید الفاظ میں مذمت کی۔
