آئی سی سی کی جانب سے ورلڈ کپ 2023 کے ترانے کی ریلیز کے بعد کرکٹ شائقین نے مایوسی کا اظہار کرتے ہوئے مشہور گلوکار علی ظفر سے ترانے کیلئے فرمائشیں شروع کردی ہیں جس پر علی ظفر نے ردعمل کا اظہار کردیا ہے۔
تفصیلات کے مطابق انٹرنیشنل کرکٹ کونسل(آئی سی سی) نے ورلڈ کپ 2023 کا آفیشل ترانا ریلیز کردیا ہے جس میں بالی ووڈ اداکار رنویر سنگھ نے اپنے فن کا مظاہرہ کیا ہے، مشہور بالی ووڈ ڈائریکٹر پریتم چکرورتی کی کمپوزیشن میں تیار کردہ اس ترانے کو ون ڈے ایکسپریس نامی ٹرین میں فلمایا گیا ہے اور اس میں متعدد بھارتی گلوکاروں کی آواز شامل کی گئی ہے۔
آئندہ ماہ بھارت میں ہونے والے ورلڈ 2023 کا آفیشل ترانا"دل بولے جشن" یوٹیوب پر ریلیز کیا گیا تو نا صرف پاکستان بلکہ بھارت کے کرکٹ شائقین نے ترانے کو سن کر مایوسی کا اظہار کیا اورترانے پر شدید تنقید کرتے ہوئے ماضی کے بہترین ترانوں کو یاد کیا اور 2011 کے ورلڈ کپ کے ترانے "دے گھما کے" کی یاد تازہ کی۔
کچھ صارفین کو پاکستان سپر لیگ کے بہترین ترانے گانے والے علی ظفر کی یاد آئی اور انہوں نے علی ظفر سے ورلڈ کپ 2023 کیلئے ترانا گانے کی فرمائشیں کردیں۔
مشہور پاکستانی گلوکار و اداکار علی ظفر نے ایسی ہی ایک فرمائش پر ردعمل دیتے ہوئے پی سی بی اور اسپانسر برانڈز اصل ذمہ دار ہیں، میرے ملک کو اگر کسی بھی جگہ پر میری ضرورت ہے تو میں ہمیشہ حاضر ہوں، تاہم میرا کام کرنے کا اپنا طریقہ ہے اور میرے اپنے آئیڈیاز ہیں۔
علی ظفر نے اپنے مخصوص انداز اپناتے ہوئے کہا کہ کارپوریٹ کلچر کی خوبیوں اور خامیوں پر میں تبصرہ نہیں کرنا چاہتا پھر بھی اگر مزہ نہیں آیا "تو بھائی حاضر ہے"۔
- Featured Thumbs
- https://www.siasat.pk/data/files/s3/15icchjshshjs.jpg
.
