لاہورہائی کورٹ میں دائر نواز شریف کو بطور پارٹی صدر بحال کرنے درخواست پر رجسٹرار نے اعتراض لگادیا۔
تفصیلات کے مطابق لاہور ہائی کورٹ میں سابق وزیراعظم نواز شریف کو دوبارہ سے پارٹی صدر کے عہدے پر بحال کرنے سے متعلق درخواست پر رجسٹرار آفس نے اعتراض لگادیا ہے، اعتراض میں کہا گیا ہے کہ نواز شریف کو پارٹی عہدے سے ہٹانے کا حکم سپریم کورٹ کی جانب سے سنایا گیا تھا ہائی کورٹ اس کیس کی سماعت نہیں کرسکتی۔
عدالت نے درخواست اعتراض کے ساتھ سماعت کیلئے منظور کر لی۔
خیال رہے کہ ایڈووکیٹ آفاق احمد کی جانب سے لاہور ہائی کورٹ میں نواز شریف کو بطور پارٹی صدر بحال کرنے سے متعلق درخواست دائر کی تھی، درخواست میں الیکشن کمیشن، وفاقی حکومت، وزیراعظم پاکستان ، چیئرمین پی ٹی آئی عمران خان اور سربراہ عوامی مسلم لیگ شیخ رشید کو فریق بنایا گیا تھا۔
درخواست گزار نے موقف اپنایا کہ عمران خان اور شیخ رشید نے نواز شریف کی نااہلی کے بعد ان کے پارٹی عہدہ رکھنے کے خلاف سپریم کورٹ میں درخواست دائر کی تھی جس کے بعد سپریم کورٹ نے نواز شریف کو پارٹی صدارت سے ہٹانے کا حکم دیا۔
درخواست گزار کے مطابق الیکشن کمیشن نے میانوالی سے عمران خان کو نااہل قرار دیا مگر انہیں پارٹی چیئرمین کے عہدےسے نہیں ہٹایا گیا، لہذا عدالت نواز شریف کو بطور پارٹی صدر بحال کرنے کے احکامات جاری کرے، تاہم رجسٹرار ہائی کورٹ نے اس درخواست کو اعتراض لگاکر واپس کردیا ہے۔
