مسلم لیگ ن کے قائد میاں نواز شریف نے موجودہ سیاسی حالات کو دیکھتے ہوئے حکومت چھوڑنے اور اسمبلیاں تحلیل کرنے پر غور شروع کردیا ہے۔
تفصیلات کے مطابق یہ دعویٰ خبررساں ادارے اےآروائی نیوز کی جانب سے ایک رپورٹ میں کیا گیا اور کہا گیا کہ مسلم لیگ ن نےوفاق میں اتحادی جماعتوں کی حکومت کے مستقبل کا فیصلہ کرلیا ہے، پارٹی قائد میاں نواز شریف نے حکومت چھوڑنے کا سگنل بھی دیدیا ہے۔
ذرائع کے حوالے سے شائع اس خبر میں دعویٰ کیا گیا ہے کہ مسلم لیگ ن کی قیادت کا رات گئے ایک اہم اجلاس ہوا جس میں موجودہ صورتحال پر تبادلہ خیال کے بعد یہ اہم فیصلے کیے گئے ہیں۔
رپورٹ کے مطابق مسلم لیگ ن کی قیادت کی جانب سے قومی اسمبلی میں چند اہم قوانین کی منظوری کے بعد اسمبلی کو تحلیل کرنے پر غور ہورہا ہے، اس کے علاوہ انتخابی اصلاحات، نیب قوانین میں ترمیم کی منظوری رواں اجلاس میں دیئے جانے کا امکان ہے ۔
مسلم لیگ ن نے نگراں وزیراعظم اور چیئرمین نیب کی تقرریوں کیلئے جلد مشاورت شروع کرنے کا بھی فیصلہ کیا ہے، ذرائع کا کہنا ہے کہ قومی اسمبلی میں راجا ریاض کے اپوزیشن لیڈر مقرر ہونے کا معاملہ بھی اسی سلسلہ کی ایک کڑی ہے۔
مسلم لیگ ن کی قیادت کی جانب سے اس مشاورت کے پیچھے مشکل فیصلوں پر حمایت نہ ملنے پر پائی جانے والی مایوسی ہے جس کی وجہ سے ن لیگ نے حکومت چھوڑ کر انتخابات کی طرف جانے پر غور شروع کردیا ہے۔