طارق بشیر چیمہ کو اپنے ایک بیان میں عمران خان کو جھوٹا کہنا مہنگا پڑگیا ہے، ٹویٹر پر ان کی ماضی میں عمران خان کی تعریفوں والی تقاریر گردش کرنے لگیں۔
تفصیلات کے مطابق مسلم لیگ ق کے رہنما طارق بشیر چیمہ نے ایک پریس کانفرنس کے دوران کہا کہ میں عمران خان کا وزیر نہیں رہنا چاہتا تھاکیونکہ وہ جھوٹ بولتے ہیں۔
طارق بشیر چیمہ کے اس بیان پر رہنما تحریک انصاف ڈاکٹر شہباز گل نے انہیں آڑے ہاتھوں لیا اور ان کے ماضی میں عمران خان کو عاشق رسولﷺ، ایماندار، محنتی اور چیلنجز قبول کرنے والے لیڈر جیسے القابات سے نوازنے والی تقاریر نکال لائے۔
طارق بشیر چیمہ نے ماضی میں ایک انٹرویو کے دوران کہا تھا کہ اگر یہ کہا جائے کہ عمران خان نے محنت نہیں کی، دن رات ایک نہیں کیا،مغز ماری نہیں کی یا جدوجہد نہیں کی تو میں یہ ماننے کیلئے تیار نہیں ہوں۔ شہباز گل نے یہ کلپ شیئر کرتے ہوئے طنز کیا اور کہا کہ طارق بشیر قوم کی خاطر دن رات ایک کر دینے والے پرخلوص اور محنتی شخص عمران خان کی کابینہ میں وزیر نہیں رہنا چاہتے تھے۔
دوسری ویڈیو میں طارق بشیر چیمہ قومی اسمبلی میں کھڑے ہوکر عمران خان کے عاشق رسول ﷺ ہونے سے متعلق دلائل دیتے دکھائی دیتے ہیں،شہباز گل نے اس کلپ کو شیئر کیا اور کہا کہ طارق بشیر چیمہ عمران خان جیسے عاشق رسولﷺ اور روضہ رسول ﷺ پر قوم کی خاطر رونے والےایماندار شخص کے وزیر نہیں رہنا چاہتے تھے۔
تیسرے کلپ میں طارق بشیر چیمہ عمران خان کے سامنے ایک تقریب سے خطاب کرتے ہوئے کہتے ہیں کہ عمران خان کا ہی کام ہے کہ وہ چیلنجز کو قبول کرلیتا ہے، اور نظام کو لے کر آگے چلتا ہے، یہ ہماری خوش قسمتی ہے۔
ڈاکٹرشہباز گل نے اس بیان کو شیئر کیا اور کہاکہ طارق بشیر چیمہ چیلنجز قبول کرنےوالے عمران خان کے وزیر نہیں رہنا چاہتے تھے۔
تحریک انصاف کے مقامی رہنما عثمان سعید بسرا نے طارق بشیر چیمہ کی جانب سے عمران خان کو جھوٹا کہنے پر ردعمل دیتے ہوئے کہا کہ طارق بشیر گنگو تیلی ہزار آسمان رخ منہ کر تھوکے ،تھوک واپس ان کے منہ پہ ہی گرتا ہے۔
شفاقت علی ہنجرہ نے طارق بشیر چیمہ کی اسمبلی میں ایک تقریر کا کلپ شیئر کیا جس میں طارق بشیر چیمہ کہتے ہیں کہ میں نے عمران خان کی نیت، ارادے اور سوچ میں جتنی حب الوطنی دیکھی ہے وہ کسی میں نہیں دیکھی۔
انہوں نے اس تقریر میں کہا کہ کسی کی بہتر سوچ، کاوش اور حکمت عملی کو محض سیاسی مخالفت کی بنا پر رد نہیں کر دینا چاہیے۔
- Featured Thumbs
- https://www.siasat.pk/data/files/s3/11tariqcheemaaiana.jpg
