وزیراعلی پنجاب مریم نواز شریف کی خواہش پر ان کی بلٹ پروف گاڑی میں تبدیلی کیلئے 2 کروڑ 73 لاکھ روپے کی ضمنی گرانٹ طلب کرلی گئی ہے۔
تفصیلات کے مطابق ایوان وزیراعلیٰ پنجاب کی جانب سے سیکرٹری خزانہ کو ایک خط ارسال کیا گیا ہے جس میں وزیراعلی پنجاب مریم نواز شریف کے استعمال کی بلٹ پروف مرسیڈیز گاڑی میں تبدیلی کیلئے ضمنی گرانٹ طلب کی گئی ہے۔
خط میں کہا گیا ہے کہ بلٹ پروف مرسیڈیز گاڑی کے ٹائرز، وزیراعلی پنجاب کی خواہش کے مطابق گاڑی کی میچنگ کے پوشش اور میٹس کی تبدیلی کیلئے فنڈز درکار ہیں، یہ فنڈز موجودہ مالی سال میں بطور ضمنی بجٹ جاری کیے جائیں گے، لہذا گاڑی کی مرمت کیلئے 2 کروڑ 73 لاکھ روپے کے فنڈز جاری کیے جائیں۔
ذرائع کا کہنا ہے کہ گاڑی کے ٹائرز بھی قبل از وقت تبدیل کیے جارہے ہیں کیونکہ ان ٹائرز کی ابھی لائف باقی ہے، مگر وزیراعلی پنجاب مریم نواز شریف کی خواہش پر گاڑی میں تبدیلیاں کرنے کیلئے فنڈز کا تقاضہ کیا گیا ہے۔
صحافی اکبر باجوہ نے اس معاملے پرردعمل دیتے ہوئے کہا کہ پوشش اور میٹس وزیراعلی کی چوائس اوررنگ کے ہیں، ٹائرز بھی خراب نہیں ہے لیکن نئے ڈالنے میں کیا حرج ہے۔
فیاض شاہ نے کہا کہ میچنگ کپڑوں اور جوتوں کے بعد اب گاڑی کی میچنگ پوشش کا خرچہ بھی غریب عوام اٹھائے گی۔
