Kitni masum hain aap... Apni maasumiat mein kya kya keh ker nikal gaye... Mein ise masumiat hi samjhun ga ya phir bewaqufi... Pakistan ki saiyah tareekh, balke yeh to Pakistan ka haal hai jo 40 saal se chalay chala ja rha hai
Chalain baat karte hain Muhajir kay maazi ki, khas taur pe us Muhajir ka mazi jo Sindh k shehri ilaqon mein aa k abaad hua. Mein yahan per kehta chalun k apni marzi se koi aa kar abaad nahi hua, balke Karachi jo us waqt ka darul khilafa tha us mein hakumat ne India kay woh musalman civil servants jo Pakistan ana chahte the un ko la ker abaad kia. In k sath woh Musalman bhi aye jo Pakistan ki muhabbat mein be sar o samani ki halat mein hijrat ki.
Silsila chalta raha naya mulk apne per per khara hone shuru hua, us waqt civil servants mein urdu bolne walay the laikin koi aisi tafreeq nahi thi, sub Pakistani the. Phir Ayub Khan ka Martial Law ka daur aya us mein us ne urdu bolne walon ki itni majority dekhi to in ki promotion rok k apne logon ko agay karne laga. Laikin asal ehsas urdu bolne walon ko us waqt hua k woh paraye hain jab Karachi ne Fatima Jinnah ko vote dia, tab Karachi ko saza mili jo aik sharamnak fail tha
Tab se ab tak Karachi ko saza der saza ili chali ja rhi hai aur humein yeh ehsas dilaya jata rha hai k hum Pakistani nahi aur hamari koi auqat nahi. Ayub Khan k baad Bhutto aya, us ne apna quota system lgaya jis mein Sindh woh wahid soba tha jis mein Urban-Rural quota lgaya gya. Bhutto ne yeh khayal Sindhi qoum mein dala k un kay dermian aik aur qoum abad hai jo Sindhi nahi. Phir muhajir per jobs band ki gayi, un ko hakumat ki jobe se retire kia gya, un hi ki universities ko un per band kia gya, Karachi ko khas taur pe ignore kia gya aur Karachi mein bureaucracy mein khas taur pe bahar se loag la ker dalay gaye. Pakistan ki bureaucracy mein yeh ehsas dala gya k muhajir baqi pakistanion se faraq hain.
1971 mein East Pakistan toota, wahan se jo pakistani wapis pakistan ana chahte the un se mein se aksariat urdu bolne walon ki thi, un k ane mein pehle Bhutto aur phir Zia-ul-haq ne jo rukawatain dali un ka aaj tak koi sani nai milta, Yani apne hi mulk k logon ko roka jaye apne hi mulk ane se. Yad rhe in logon ne us Pakistan kay liye jis kay baray mein aap loag roz yad karte aur rote hain is forum pe lakin karte kuch nahi us Pakistan kay liye bepana qurbani di thi. Mera khandan bhi wahin se aya tha aur jo mushkil hui humein West Pakistan aa k bayan nahi ker sakta. Pehle to mere dadi, dada aur un ki family ko la ker phek dia gya aik camp mein aur un ko is tarah treat kia jata tha k woh Pakistani hi nai. Un ko ID card nai mila, un se kaha gya k nahi mil sakta yani Pakistani ko Pakistan mein ID card nai mil sakta,khali is bina pe kay woh urdu bolta hai. Aur bhi batein hain jo yahan bayan nahi ker sakta.
Jab Altaf Hussain ne APMSO ki bunyad rakhi to us k sath chand aik hi loag gaye the us waqt bhi, kyun k Muhajir jis ko bolte hain woh aik quom hi nai na hi aik zuban bolte hain. Yeh to hakumat ka zulm tha k huemin aik hone per majboor kia. Phir Zia-ul-Haq sahab ne socha k Muhajir per kam zulm hua hai un kay pass naukri nahi, kahne ko nahi, unho ne Afghani refugees la ker Karachi mein dump ker diye. Us se phir Klashinkov mutarif hui Karachi mein aur organised gangs bhi. Is ka nateeja Sohrab Goth pe qatal-e-aam tha, phir Qasba Aligerh mein unhi East Pakistan se aye hue logon per jo zulm dhaye gaye us ki misal nahi milti Pakistan mein.
Us waqt Karachi ki numainda jamat JI thi, jis ki leadership ne is sub pe bolne kay bjaye khamoshi ikhtiar ki jis ka nateeja yeh nikla k un ka apne loag un ki jamaat chor k aik unknown jamaat MQM mein shamil hui. MQM woh whaid jamaat thi jis ne aaz uthai is zulm k khilaf, jis ne awaz uthai east pakistan se aye hue logon ki, jis ne awaz uthai tamam muhjiron kay liye
Bhai mere Muhajiron ko sub se ziada nuksan is mulk kay hukamrano aur is mulk ki establishment ne pochaya jis ne yeh soch k yeh loag jawab nahi dain gay in k sath jo kerna hai ker lo. Is chez ko hamare zehen mein paida hotw hi dala gya k hum Pakistani hi nahi. Jawab mein tum ko kya milay ga? Phool? Pati? Nahi MQM aur Altaf Hussain. Is zulm ka nateeja hai MQM.
Tabhi mein kehta hum is forum k loag itne masum hain, in ko in ki establishment ko btate hain yaqeen ker lete hain, khud ja k tehqeeq karne ki kisi mein jurrat nahi. Hum to yeh jeete hain her din.
