عدالت میں سماعت کے دوران گزشتہ روز مریم نواز شریف نے عدالت میں ہی نماز کی ادائیگی کی اور مسلسل تسبیحات پڑھتی دکھائی دی ہیں۔
خبررساں ادارے کی رپورٹ کے مطابق مسلم لیگ ن کی نائب صدر مریم نواز شریف کے خلاف گزشتہ روز اسلام آباد ہائی کورٹ میں ایون فیلڈ کیس میں اپیلوں پر سماعت ہوئی، دوران سماعت مریم نواز شریف نے اپنی کرسی پر ہی بیٹھے بیٹھے نماز پڑھی اور سماعت کے دوران مسلسل تسبیحات پڑھتی دکھائی دیتی رہیں۔
دوران سماعت ججز نے ریمارکس دئیے کہ اگر ٹرسٹ ڈیڈ پر مریم نواز اور حسین نواز کے دستخط موجود ہیں اور وہ اسے تسلیم کرتے ہیں تو ٹرسٹ ڈیڈ جعلی نہیں۔ یہ جعلسازی کے زمرے میں نہیں آتا۔ اگر حسین نواز آ کر کہہ دیتے کہ دستخط ان کے نہیں تو پھر بات جعلسازی کی طرف جاتی۔
گزشتہ روز سماعت کے بعد مریم نواز پرامید ہیں کہ وہ باعزت بری ہوجائیں گی جس کااظہار انہوں نے میڈیا کے سامنے بھی کیا۔
سماعت کے بعد میڈیا نمائندوں سے گفتگو کرتے ہوئے مریم نواز شریف کا کہنا تھا کہ آج وہ حالات پیدا ہوگئے ہیں کہ اب کسی کیلئے بھی عمران خان کی حکومت قابل قبول نہیں ہے، عمران خان نے خود خارجہ، خزانہ اور توانائی کی وزارتوں میں کوئی تعریفی سند تقسیم نہیں کی کیونکہ ان وزارتوں نے بدترین کارکردگی کا مظاہرہ کیا۔
انہوں نے مزید کہا کہ عمران کو معلوم ہے کہ حال کے بعد مستقبل بھی ان کا نہیں ہے، ان کی تقریریں درحقیقت ان کی چیخیں ہیں، حکومت کی کشتی ڈوب رہی ہے، ان کے اپنے اتحادی جان چکے ہیں کہ تاریخی ناکامی کا بوجھ لے کر عوام میں نہیں جاسکتے، اسی لیے عمران کی کشتی میں سوار لوگ جمپ کرنے کو تیار ہیں۔
- Featured Thumbs
- https://www.siasat.pk/data/files/s3/maryamn111ii1.jpg
