سابق فاسٹ باؤلر محمد آصف نے قومی ٹیم کے کپتان بابراعظم کو میڈان اوور کروانے کا دعویٰ کیا ہے جس پر سوشل میڈیا صارفین نے انہیں ان کی ہی گزشتہ رات کی گفتگو کا کلپ شیئر کرکے آئینہ دکھادیا جس میں وہ کھلاڑیوں کے بارے میں بات کرتے ہوئے گالیاں دیتے سنائی دے رہے تھے۔
تفصیلات کے مطابق محمد آصف نے ایک موقع پر گفتگو کرتے ہوئے کہ بابراعظم ملک کے بہترین بلے بازوں میں سے ایک ہیں، تاہم وہ پاور پلے میں بہت زیادہ ڈاٹ گیندیں کھیلتے ہیں جس کی وجہ سے دوسری سائیڈ پر موجود رضوان پر پریشر بڑھتا ہے۔
انہوں نے مزید کہا کہ اگر آپ بابراعظم کو اچھی گیند کروائیں تو وہ مار نہیں سکیں گے، میں آج بھی ٹی 20 کرکٹ میں بابراعظم کو پورا اوور میڈ ان کرواسکتا ہوں۔
محمد آصف نے ورلڈ کپ اسکواڈ سے متعلق اپنی رائے دیتے ہوئے کہا کہ ہمار ے اسکواڈ میں شامل تمام باؤلرز ایوریج ہیں، ان میں کسی میں بھی کوئی خاص بات نہیں ہے۔
محمد آصف کی اس گفتگو کے بعد ٹویٹر پر ان کی گزشتہ رات بھارتی صارفین کی ہوسٹنگ میں شروع کی گئی اسپیس میں گفتگو وائرل ہوئی جس میں وہ اپنے ہی کھلاڑیوں کی حوصلہ شکنی کرتے اور انہیں گالیاں دیتے واضح طور پر سنے جاسکتے تھے۔
محمد آصف نے گفتگو کے دوران بابراعظم، شاہین آفریدی، سلمان آغا کے بارے میں متنازعہ گفتگو کی، بہت سے کھلاڑیوں کو پرچی قرار دیا اور لیجنڈ کرکٹر شاہد آفریدی پر اپنے داماد شاہین آفریدی کو کپتان بنوانے کی کوششوں کا الزام بھی دھر دیا۔
اسپورٹس جرنلسٹ اور اینکر قادر خواجہ نے کہا کہ ملک کو بیچنے والا اب ہمار ے کھلاڑیوں کے بارے میں ایسی گفتگو کرے گا؟ دوسروں کو نصیحت اور خود میاں فصیحت والی مثال ہے، بلیک میلرز کا ایجنڈا سب کے سامنے ایکسپوز ہوگیا۔
قادر خواجہ نےد وسری ٹویٹ میں اسپیس میں ہونے والی گفتگو کی ریکارڈنگ شیئر کی اور کہا کہ اللہ ایسے بلیک میلرز اور جواریوں سے بچائے جنہوں نے ملک کی عزت کو بیچا اور اب ہمارے کھلاڑیوں کا موارل ڈاؤن کررہےہیں اور انہیں گالیاں دے رہے ہیں۔
صحافی و بلاگر سعد مقصود نے کہا کہ ٹکے ٹکے کے لوگ اور جواری اب پاکستانی ٹیم کے کھلاڑیوں پر تبصرے کریں گے، محمد آصف ایک بڑا باؤلر تھا مگر انہیں اپنا داغدار ماضی دیکھنا چاہیے اور پھر اپنے گالیوں سے بھرے تبصرے، ان سے ہزار درجے بہتر وہ ہیں جنہوں نے ملک نہیں بیچا۔
