مسلم لیگ ن کے قائد نوازشریف نے شہباز شریف کو پی ٹی آئی سے سیاسی انتقام لینے سے روک دیا اور فیصلہ کیا الیکشن اسمبلی مدت پوری ہونے پر ہی کرائے جائیں گے۔
اے آر وائے کے مطابق مسلم لیگ ن کی لندن میں اہم بیٹھک کا احوال سامنے آگیا ، ذرائع کا کہنا ہے کہ نوازشریف نے شہباز شریف کو تحریک انصاف کیخلاف سیاسی انتقام سے روک دیا۔
لیگی قیادت نے تسلیم کیا کہ توہین مذہب جیسے مقدمات کے اندراج سے پارٹی کی ساکھ کو نقصان پہنچا لیکن پی ٹی آئی دورمیں ہونے والی بے ضابطگی موجود ہے تو اس کیخلاف کارروائی ضرور ہوگی۔
لندن بیٹھک میں الیکشن اسمبلی مدت پوری ہونے پر کرائے جانے کا فیصلہ کرتے ہوئے کہا ہے کہ معاشی استحکام کیلئے ضروری ہے سب کو اعتماد میں لیا جائے، عمران خان سمیت کسی بھی دوسرے دباؤ کو قبول نہیں کیا جائے گا۔
دوسری جانب اسحاق ڈار کو میڈیا پر معیشت سے متعلق بات کرنے سے روک دیا گیا، اسحاق ڈار صرف وزیر خزانہ مفتاح اسماعیل کی رہنمائی کریں گے۔
ن لیگی ذرائع کا کہنا تھا کہ ملاقات میں مفتاح اسماعیل کو آئی ایم ایف سے اچھی ڈیل لانے کا ٹاسک بھی دیا گیا ہے اور شاہد خاقان عباسی کو بھی معیشت میں بہتری کیلئے مشاورت کیلئے لندن بلایا گیا ہے۔