وفاقی وزیرا طلاعات فواد چوہدری نے کہا ہے کہ پوری قوم ملک میں بین الاقوامی کرکٹ کی بحالی پر جشن منارہی ہے صرف اپوزیشن کے پیٹ میں ہی مروڑ اٹھ رہے ہیں۔
مائیکروبلاگنگ ویب سائٹ ٹویٹر پر اپنے ایک پیغام میں وفاقی وزیر اطلاعات فواد چوہدری نے اپوزیشن کی جماعتوں کی جانب سے راولپنڈی میں احتجاجی تحریک شروع کرنے کے اعلان کو پاک آسٹریلیا کرکٹ سیریز سے منسلک کرتے ہوئے اپوزیشن کو تنقید کا نشانہ بنایا۔
فواد چوہدری نے کہا کہ 23 سال بعد پاکستان ، آسٹریلیا کے خلاف ٹیسٹ سیریز کی میزبانی کرنے جارہا ہے، پوری قوم کرکٹ کی بحالی پر جشن منارہی ہے لیکن اگر کسی کے پیٹ میں مروڑ اٹھ رہے ہیں تو وہ ہماری چوں چوں کا مربع اپوزیشن ہے۔
انہوں نے مزید کہا کہ اپوزیشن عین اس وقت راولپنڈی میں اپنا کرائے کا شو منعقد کرنا چاہتی ہے جب وہاں پاکستان اور آسٹریلیا کی کرکٹ ٹیموں کے درمیان پہلا ٹیسٹ میچ شروع ہوگا۔
واضح رہے کہ 1998 کےبعد پہلی بار آسٹریلیا کی ٹیسٹ ٹیم پاکستان کا دورہ کرنے جارہی ہے، دونوں ملکوں کی کرکٹ ٹیموں کے مابین4 مارچ سے پہلا ٹیسٹ میچ راولپنڈی میں شروع ہوگا۔
دوسری جانب اپوزیشن جماعت پیپلزپارٹی کی جانب سے 27 فروری کو کراچی سے حکومت کے خلاف لانگ مارچ کے آغاز کا اعلان کیا گیا ہے جو مختلف شہروں سے ہوتا ہوا3 مارچ کو لاہور اور 6
مارچ کو اسلام آباد پہنچے گا، جبکہ پاکستان ڈیموکریٹک موومنٹ نے بھی 10 مار چ سے لانگ مارچ کا اعلان کیا ہے۔