کراچی : چیئرمین پیپلزپارٹی بلاول بھٹو زرداری نے یوم دفاع کے موقع پرخصوصی پیغام میں کہا ہے کہ فرض کی ادائیگی کے دوران جام شہادت نوش کرنے والے ہمارے ہیروہیں ۔
پی پی پی چیئرمین بلاول بھٹو نے سرحدوں کا دفاع اور دہشت گردی کے خلاف جنگ میں شہید ہونے والے فوجی جوانوں اورشہریوں کو خراج عقیدت پیش کرتے ہوئے کہا ہے کہ ہماری آنیوالی نسلوں کی یادوں میں ہمارے شہید ہمیشہ زندہ رہیں گے، انتہاپسندی و دہشتگردی کا نشانہ بن کر جانیں قربان کرنے والے بھی قوم کے ہیرو ہیں۔
بلاول بھٹوزرداری نے کہاکہ شہید بھٹو نے جوہری پروگرام کی بنیاد رکھی، جو اب پاکستان کے دشمنوں کے لیئے حوصلہ شکن فصیل ہے۔ شہید محترمہ بینظیر بھٹو نے بیلسٹک میزائل ٹیکنالوجی دے کراپنے والد کے ویژن کو پایئہ تکمیل پر پہنچایا اورجمہوری حکومتوں کے دوران ہمیشہ پاکستان کے دفاع کو پہلے سے زیادہ طاقتور بنایا گیا۔
بلاول بھٹو زرداری کا کہنا تھا کہ وفاقی سیاسی قوتیں نظریہ پاکستان کی علمبردار ہیں، اُن قوتوں کو جان بوجھ کر نقصان پہنچانے یا کمزور کرنے کی کوششیں پاکستان کی سالمیت کو نقصان پہنچائیں گی ۔ پیشہ ورانہ، متحد اور نظم و ضبط رکھنے والے ادارے ناقابلِ تسخیر دفاع کے ضامن ہیں۔ ان کامزید کہنا تھا کہ پیپلز پارٹی کی قیادت اور کارکنان اپنے شہید قائدین کے وژن کے مطابق پاکستان کے مضبوط دفاع کے لئے سرگرمِ عمل رہیں گے ۔ پارٹی کے شہید قائدین نے اپنی جانوں کی قربانیاں تو دے دیں لیکن ملک کے دفاع، سلامتی اور جمہوریت پر سمجھوتہ نہیں کیا ہے ۔
http://gnnhd.tv/urdu/index.php/Pakistan/15868-1599332400