پاکستان تحریک انصاف نے نگراں وزیراعظم کی جانب سے عمران خان بغیر انتخابات سے متعلق بیان پرردعمل دیتے ہوئے ایسے انتخابات کو غیر آئینی قرار دیدیا ہے۔
تفصیلات کے مطابق پاکستان تحریک انصاف کے ترجمان کی جانب سے جاری کردہ بیان میں کہا گیا ہے کہ تحریک انصاف ملک کی سب سے بڑی اور مقبول سیاسی جماعت ہیں اور عمران خان مقبول ترین سیاسی لیڈر ہیں، پی ٹی آئی یا عمران خان کی شمولیت کے بغیر کروایا گیا کوئی بھی الیکشن غیر آئینی، غیر قانون اور غیر اخلاقی ہوگا۔
ترجمان پی ٹی آئی کا مزید کہنا تھا کہ نگراں وزیراعظم کا یہ بیان ملکی مفادات اور آئین و جمہوریت کے حوالے سے ریاستی ڈھانچے میں پائی جانے والی عدم حساسیت کا مظہر ہے، نگراں وزیراعظم کو پتا ہونا چاہیے کہ عوام عمران خان کے بغیر کوئی بھی الیکشن قبول نہیں کریں گے، آئین ، قانون و جمہوریت نگراں وزیراعظم کو سیاست و انتخابات پر اثر انداز ہونے یا کسی غیر فطری، غیر جمہوری و غیر آئینی منصوبے کا حصہ بننے کی اجازت نہیں دیتی۔
انوارالحق کاکڑ اپنے بیان کی فوری وضاحت کریں اور بطور نگران وزیراعظم اپنی حکومت کو جمع تفریق کے شرانگیز منصوبوں سے مکمل الگ کریں۔
انہوں نے نگراں وزیراعظم سے بیان کی وضاحت طلب کرتے ہوئے کہا کہ غیر معمولی عوامی تائید کے حامل سیاسی لیڈر اور جماعت کو غیر آئینی و غیر جمہوری طریقےسے انتخابات سے باہر کرنے کے نتائج ہمیشہ تباہ کن ہوا کرتے ہیں۔
خیال رہے کہ نگراں وزیراعظم انوارالحق کاکڑ نے اپنے ایک بیان میں کہا تھا کہ سابق وزیراعظم عمران خان کے بغیر بھی ملک میں منصفانہ انتخابات منعقد کروائے جاسکتے ہیں۔
- Featured Thumbs
- https://www.siasat.pk/data/files/s3/10anwarkakarradamla.png
