
پاکستان تحریک انصاف کے ممکنہ لانگ مارچ روکنے کیلئے سندھ پولیس کے اہلکاروں کو اسلام آباد ہائی کورٹ بھیجنے کے خلاف درخواست دائر کردی گئی ہے۔
تفصیلات کے مطابق وفاقی دارالحکومت اسلام آباد میں پاکستان تحریک انصاف کے لانگ مارچ کے دوران امن وامان کی صورتحال برقرار رکھنے کیلئے سندھ پولیس کی اضافی نفری طلب کی گئی تھی جس کے خلاف اسلام آباد ہائی کورٹ میں درخواست دائر کردی گئی ہے۔
https://twitter.com/x/status/1585239306691825664
درخواست میں استدعا کی گئی ہے کہ صوبہ سندھ میں کے سیلاب زدہ علاقوں میں پولیس اہلکاروں کی اشد ضرورت ہے، جبکہ کراچی شہر میں گزشتہ کئی ماہ سے اسٹریٹ کرائمز کی وارداتوں میں بھی اضافہ ہوچکا ہے ، لہذا عوام کے تحفظ کیلئے پولیس کی سندھ میں موجودگی ضروری ہے۔
پاکستان تحریک انصاف کے رہنما حلیم عادل شیخ کی جانب سے دائر کردہ درخواست میں حکومت سندھ اور آئی جی سندھ کو فریق بنایا گیا ہے اور عدالت سے استدعا کی گئی ہے کہ سندھ حکومت کو 6ہزار اہلکاروں کو واپس بلوانے کے احکامات جاری کیے جائیں اور حکومت سندھ اور آئی جی سندھ کو کراچی میں اسٹریٹ کرائمز کی واارداتوں کی روک تھام کیلئے پولیس اہلکاروں کی تعیناتی کا حکم بھی دیا جائے۔
- Featured Thumbs
- https://www.siasat.pk/data/files/s3/14sindhpolice.jpg