سعودی عرب کے دارالحکومت ریاض میں ایک میوزک کانسرٹ منعقد کیا گیا جس میں ہزاروں کی تعداد میں لوگوں نے شرکت کی، کانسرٹ میں بالی ووڈ سپر اسٹار سلمان خان بھی جلوہ گر ہوئے۔
بین الاقومی میڈیا رپورٹس کے مطابق بالی ووڈ دبنگ خان ، شلپا سیٹھی سمیت متعدد بالی ووڈ کے اسٹارز نے گزشتہ رات اس میوزک کانسرٹ میں پرفارم کیا اور ہزاروں افراد سے داد وصول کی، اسٹارز نے کانسرٹ میں مختلف گانوں پر ڈانس کیا اور لوگوں کو انٹرٹین کیا۔
اس موقع پر دبنگ خان نے کانسرٹ میں شریک افراد سے بات کی اور کہا کہ سعودی عرب میں ایسےپروگرامز اب ہوتے رہیں گے سب خوش رہیں اور اپنا خیال رکھیں۔
انہوں نے کہا کہ اس ملک میں رہنے والے سب ایک دوسرے سے پیار و محبت سے رہیں اور محنت سے کام کریں ، آپ سے جلد اگلی ملاقات ہوگی۔
یادرہے کہ سلمان خان، شلپا سیٹھی سمیت دیگر فنکار گزشتہ روز ریاض پہنچے تھے اور انہوں نے ریاض میں ایک پریس کانفرنس سے خطاب بھی کیا تھا ، بالی ووڈ اسٹارز کو گزشتہ رات ریاض کے مشہور تفریحی و سیاحتی مقام بلیوارڈ ریاض سٹی میں منعقد ہونے والے کانسرٹ کیلئے سعودی عرب بلایا گیا تھا۔