وفاقی وزیر داخلہ رانا ثنا اللہ نے کہا ہے کہ جوڈیشل کمپلیکس پر حملہ عدالتی نظام کو یرغمال بنانے کی سازش ہے، ایک شخص نے مسلح گروہ کے ہمراہ عدالتی نظام کو یرغمال بنانے کی کوشش کی۔
وزیر داخلہ رانا ثنا نے تصدیق کی کہ جوڈیشل کمپلیکس پر حملے کا مقدمہ درج کر دیا گیا ہے، ملوث افراد کی سی سی ٹی وی کے ذریعے شناخت کی جا رہی ہے، عمران خان سمیت سب کو گرفتار کیا جائے گا۔
مسلم لیگ (ن) کے مرکزی رہنما رانا ثنا اللہ نے کہا کہ یہ وہی شخص ہے جس کے پاس فارن فنڈنگ کا جواب ہے اور نہ ہی توشہ خانہ سے اربوں کی چوری کا۔ عمران خان کو ایسا کرنے کی ترغیب اس کو دی جانے والی اسپیشل ٹریٹمنٹ کا نتیجہ ہے، معزز عدلیہ کو ان قانون شکنوں کے خلاف کسی قسم کی رعایت نہیں برتنی چاہیے۔
وفاقی وزیر داخلہ رانا ثنا اللہ نے کہا کہ یہ عدلیہ کی عزت و تکریم کا معاملہ ہے اس میں کسی صورت نرمی نہیں برتی جائے گی، قانون کا احترام نہ کرنے اور غنڈہ گردی کرنے والوں کے خلاف کارروائی کی جائے گی۔