چیئرمین اپٹما حامد زمان کا کہنا ہے کہ اگر یہ ٹیکس پر ٹیکس لگائیں گے اور کارپورٹ سیکٹر کو مایوس کریں گے تو لوگ ٹیکس نیٹ سے باہر نکل جائیں گے، ریونیو نہیں بڑھے گا بلیک میں کاروبار بڑھ جائے گا۔
چیئرمین اپٹما نارتھ زون حامد زمان کا کہنا ہے کہ یہ جو کام موجودہ حکومت کر رہی ہے اس سے ملک بچتا ہوا نظرنہیں آرہا، انڈسٹری کی صورتحال برقرار نہ رکھی گئی تو معیشت تباہ ہوجائے گی۔ اس وقت سب سے زیادہ ضرورت بیرونی سرمایہ کاری کی ہے، یہ اسی طرح ٹیکس بڑھائیں گے تو لوگ بلیک میں کاروبار کرنے لگیں گے۔
انہوں نے کہا وزیراعظم کی جانب سے سپر ٹیکس لگانے کے اعلان پر گفتگو میں کہا کہ اس وقت حکومت کو ایک ہنگامی صورتحال کا سامنا ہے، ہنگامی صورتحال کے پہلے تو آثار نہیں تھے لیکن 2 سے 3 ماہ میں جو صورتحال پیدا ہوئی وہ سمجھ سے بالاتر ہے۔
ان کا مزید کہنا تھا کہ لانگ ٹرم آنیوالی حکومت ہی درست فیصلے کرسکتی ہے ، حکومت ٹیکس نیٹ میں نئے لوگوں کو نہیں لارہی، 9 لاکھ لوگ صرف ٹیکس پیئر ہونگے تو ملک کہاں جائے گا، سپر ٹیکس جیسے اقدامات سے سرمایہ کاری کم ہوگی بڑھے گی نہیں۔
انہوں نے یہ بھی کہا کہ حکومت افراتفری پھیلا کر غلط کر رہی ہے، ایکسپورٹ نیچے گئی، فیکٹریاں بند ہوئیں تو حالات بس میں نہیں ہونگے، انہیں یہ بیان چھوڑ دینا چاہیے کہ ہم ملک بچانے آئے ہیں، جو کام یہ حکومت کر رہی ہے اس سے ملک بچتا ہوا نظرنہیں آ رہا۔