مسلم لیگ ن کی نائب صدر مریم نواز شریف کی جانب سے سوشل میڈیا پر ایک اور غلطی پکڑی گئی ہے، مظاہرین کی جانب سے نذر آتش کیے گئے پاک فوج کے علامتی جہاز کو ایم ایم عالم سے منسوب کردیا، سوشل میڈیا صارفین نے تصحیح کردی۔
تفصیلات کے مطابق پی ٹی آئی کے مظاہروں کے دوران مشتعل مظاہرین نے پاک فضائیہ کا ایک علامتی جہاز نذر آتش کردیا تھا جس کے بارے میں مسلم لیگ ن کی نائب صدر مریم نواز شریف کو اپنی ناقص معلومات ظاہرکرکے سبکی اٹھانا پڑی ہے۔
مائیکروبلاگنگ ویب سائٹ ٹویٹر پر مریم نواز شریف نے اس جہاز کی تصویر شیئرکرتے ہوئے کہا کہ ایم ایم عالم نے جس جہاز سے ایک منٹ میں بھارت کے 6 جنگی جہاز مار گرائے اسے تم(عمران خان) اور تمہارے بلوائیوں نے جلا کر راکھ کردیا ہے، عمران خان تم پاکستانی کہلانے کے لائق ہو؟ کون ہو تم ؟ تمہیں کس نے بھیجا ہے؟
دفاعی معلومات پر نظر رکھنے والے خبررساں ادارے نے بھی ٹویٹر پر مریم نواز کی ٹویٹ کی تصحیح کی اور بتایا کہ ایئر کموڈور محممد محمود عالم ایک ایف 86 میں سوار تھے، وہ جہاز اس وقت کراچی کے میوزیم میں نمائش کیلئے رکھا گیا ہے۔
مریم نواز شریف کی جانب سے اس جہاز کو ایم ایم عالم سے منسوب کیے جانے پر سوشل میڈیا صارفین نے ان کی معلومات کی درستگی کی اور ان کے علم میں اضافہ کرتے ہوئے بتایا کہ ایم ایم عالم نے جس جہاز سے بھارت کے 6 جنگی جہازوں کو مار گرایا تھا وہ اس وقت پاک فضائیہ کے کراچی میوزیم میں محفوظ ہے۔
ارشد شریف کی اہلیہ جویریہ صدیقی نے مریم نواز کو جواب دیتے ہوئے کراچی میوزیزیم میں محفوظ طیارے کی تصویر شیئر کی اور کہا کہ ایم ایم عالم نے 1965 کی جنگ میں ایف 86 طیارہ چلاتے ہوئے دشمن پر حملے کیے ۔
اظہر خان نامی صارف نے کہا کہ عمران خان نے ٹھیک کہا تھا کہ شریف خاندان اتنا پڑھا لکھا نہیں اور نا ہی وہ سمجھنے کی کوشش کرتے ہیں۔
شہر بانو نامی صارف نے کہا کہ ایک تو یہ لوگ کم پڑھے لکھے ہیں، دوسرا یہ علم حاصل کرنے کی کوشش بھی نہیں کرتے۔
حمزہ حامی نے کہا کہ جس کا یہ معیار ہو اسے بھی وزیراعظم بننا ہے، کوئی انہیں بتائے کہ نذر آتش کیا گیا جہاز ایک ڈمی تھا۔
کاشف بلوچ نے کہا کہ یہ جھوٹی فتنہ، جھوٹ پھیلانا کب بند کرے گی، ایم ایم عالم کا جہاز کراچی میوزیم میں ہے جس سے ایم ایم عالم نے دشمن کے طیاروں کو مار گرایا۔