تحریک انصاف کے رہنما ڈاکٹر شہباز گل نے عمران خان کو "دونمبر" کہنے پر مریم نواز شریف کو آڑے ہاتھوں لے لیا۔
مائیکروبلاگنگ ویب سائٹ ٹویٹر پر اپنے بیان میں ڈاکٹر شہباز گل نے مریم نواز کی جانب سے عمران خان پر تنقید ردعمل دیا اور کہا کہ سیاست کریں بدتمیزی نہیں۔
مریم نواز شریف نے اپنی تقریر میں سابق وزیراعظم عمران خان کا شدید تنقید کا نشانہ بناتے ہوئے کہا تھا کہ"انقلابیوں کا لیڈر عمران خان دو نمبر ہے"۔
ڈاکٹر شہباز گل نے مریم نواز کے اس بیان پر ردعمل دیتے ہوئے کہا کہ عقل کو ہاتھ ماریں اگر جواب میں عمران خان نے آپ کو دو نمبر کہہ دیا تو آپ کی کیا عزت رہ جائے گی، سیاست کریں بدتمیزی اور توں تڑاخ کیلئے صفدر بھائی آپ کے پاس ہیں، دل کھول کر بے عزتی کریں۔
دوسری ٹویٹ میں شہبا ز گل نے مریم نوا ز کی جانب سے لانگ مارچ میں خیبر پختونخوا حکومت کے ہیلی کاپٹر کے مبینہ استعمال کے معاملے پر تنقید کا جواب دیا۔
شہباز گل نے کہا محترمہ سے سوال ہونا چاہیے کہ جس ہیلی کاپٹر میں بیٹھ کر وہ خیبر پختونخواآئی ہیں وہ جہاز جہیز میں نہیں آیا تھا، آپ ایک سزا یافتہ مجرم ہیں، آپ کس حیثیت سے عوام کے ٹیکس کے پیسے سے ہیلی کاپٹر میں بیٹھ کر جلسہ کرنے کیلئے مانسہرہ پہنچتی ہیں؟
