آئی ٹی کا شعبہ آئندہ آنے والوں دنوں میں انجن آف گروتھ ثابت ہونے والا ہے: وزیر خزانہ
وفاقی کابینہ کی منظوری کے بعد وزیر خزانہ اسحاق ڈار نے موجودہ اتحادی حکومت کی طرف سے دوسرا بجٹ برائے مالی سال 2023-24ء پیش کرتے ہوئے اپنا کاروبار کرنے والے فری لانسرز کیلئے متعدد ٹیکس سہولتیں دینے کا اعلان کر دیا ہے۔
وزیر خزانہ کا کہنا تھا کہ انفارمیشن ٹیکنالوجی اور آئی ٹی خدمات ملک کے سب سے تیزی ترقی کرتے ہوئے شعبے ہیں جن کا ملکی برآمدات میں بہت بڑا حصہ ہے۔آئی ٹی کا شعبہ آئندہ آنے والوں دنوں میں انجن آف گروتھ ثابت ہونے والا ہے۔
اسحاق ڈار کا کہنا تھا کہ اپنا کاروبار کرنے والے فری لانسرز کے حوالے سے پاکستان اس وقت دنیا بھر میں دوسرے نمبر پر موجود ہے۔ آئی ٹی کے شعبے کو بین الاقوامی معیشت میں مسائل کے باعث مشکلات کا سامنا کرنا پڑا لیکن ہمیں یقین ہے بہت جلد اس شعبے میں بہتری آئے گی۔ حکومت اس شعبے کو درپیش مسائل کے حل کیلئے متعدد اقدامات کر رہی ہے جس میں اگلے مالی سال میں 50 ہزار آئی ٹی گریجوایٹس کو فنی تربیت دینا شامل ہے۔
انہوں نے کہا کہ انفارمیشن ٹیکنالوجی کی برآمدات میں اضافے کیلئے انکم ٹیکس 0.25 فیصد تک کی رعایتی سہولت دی گئی ہے جو 30 جون 2026ء تک جاری رہے گی۔ آئی ٹی فری لانسرز کو ماہانہ بنیادوں پر سیلز ٹیکس میں دشواری کے سامنے کے باعث کاروباری ماحول میں آسانیوں کیلئے 24 ہزار ڈالرز تک کی سالانہ برآمدات پر سیلز ٹیکس گوشواروں اور رجسٹریشن سے مستثنیٰ قرار دے رہے ہیں۔
وزیر نے کہا کہ آئی ٹی برآمدات کرنے والے کاروباری افراد کیلئے ایک سادہ انکم ٹیکس ریٹرن کا اجراء کر رہے ہیں۔ ایسے افراد کو اجازت دی جائے گی کہ وہ اپنی برآمدات کی مالیت کے 1 فیصد کے برابر قیمت کے ہارڈویئر اور سافٹ ویئرز بغیر کوئی ٹیکس ادا کیے درآمد کر سکیں۔ حکومت کی طرف سے ان آئی ٹی درآمدات کی حد سالانہ بنیادوں پر 50 ہزار ڈالرز تک مقرر کی گئی ہے۔
اسحاق ڈار کا کہنا تھا کہ آئی ٹی خدمات وایکسپورٹرز کیلئے آٹومیٹڈ ایگزیمنیشن سرٹیفکیٹ جاری کرنے کو ہم یقینی بنائیں گے جس کیلئے اس شعبے کو ایس ایم ایز کا درجہ دے رہے ہیں جس سے اس شعبہ کو انکم ٹیکس ریٹس کا فائدہ حاصل ہو گا۔
وفاقی دارالحکومت میں آئی ٹی سروسز پر سیلز ٹیکس کی شرح 15 سے 5 فیصد کر رہے ہیں، اس شعبے میں قرضوں کی طرف راغب کرنے کیلئے بینکوں کو 20 فیصد رعایتی ٹیکس کا استفادہ ملے گا۔
