عوامی نیشنل پارٹی کے رہنما ایمل ولی خان نے سپریم کورٹ کے عمران خان سے متعلق فیصلے پر کڑی تنقید کردی، ایمل ولی خان نے کہا ہے انصاف کا سلسلہ اسی طرح رہا تو عوام سپریم کورٹ کو آگ لگا دیں گے۔
عوامی نیشنل پارٹی کے صوبائی صدر ایمل ولی خان نے اپنے ایک بیان میں کہا اگر انصاف کا پیمانہ اسی طرح رہا تو شاید عوام سپریم کورٹ کو بھی آگ لگا دیں گے۔
اگر چیف جسٹس کا سیاسی رویہ جاری رہا تو ہم کسی بھی قانون کا خیال نہیں رکھیں گے۔ چیف جسٹس سپریم کورٹ کے جج نہیں بلکہ عمران خان کے ذاتی ملازم لگ رہے ہیں۔
ایمل ولی خان نے مزید کہا تاریخ میں پہلی بار دیکھ رہے ہیں کہ ایک ملزم کو ریمانڈ کے دوران رہائی کا پروانہ تھما دیا گیا۔ کیا یہ سہولت پاکستان کے ہر شہری کو حاصل ہے؟سپریم کورٹ میں لاکھوں مقدمات زیرالتوا پڑے ہیں یہاں لوگ مرجاتے ہیں لیکن انصاف ملنا تو دور کی بات تاریخ بھی نہیں دی جاتی۔ انصاف دینے والے اگر سیاسی کھیل کھیلیں گے تو ردعمل بھی سیاسی آئے گا۔
اے این پی کے رہنما کا کہنا تھا ملزم کی گرفتاری پر پرتشدد واقعات، سرکاری و نجی اور تاریخی املاک کو آگ لگائی گئی اور چیف جسٹس اس تباہی کے ذمہ دار ہیں کیونکہ وہ عمران نیازی کے ذاتی ملازم کا کردار ادا کر رہے ہیں۔
سپریم کورٹ نے گزشتہ سماعت میں سابق وزیراعظم عمران خان کی گرفتاری غیرقانونی قرار دی تھی، سپریم کورٹ نے اسلام آباد ہائی کورٹ سے دوبارہ رجوع کرنے کی ہدایت بھی تھی، چیف جسٹس نے ریمارکس دیے تھے ہم ملک میں امن چاہتے ہیں، ہائی کورٹ کیس کی سماعت کرے،ہائی کورٹ کا فیصلہ ماننا ہوگا۔
