جھوٹی خبریں پھیلانے والوں کے خلاف پیمرا سے رجوع کیا جائے گا: الیکشن کمیشن
پچھلے چند دنوں سے خبریں چل رہی تھیں کہ الیکشن کمیشن آف پاکستان نے انتخابات میں تاخیر کا فیصلہ کیا ہے جس پر الیکشن کمیشن کی طرف سے ردعمل جاری کر دیا گیا ہے۔ ذرائع کے مطابق الیکشن کمیشن آف پاکستان نے الیکشن میں تاخیر کی خبروں کے حوالے سے بیان جاری کرتے ہوئے کہا کہ آئندہ عام انتخابات طے شدہ شیڈول کے مطابق 8 فروری کو ہوں گے۔ انتخابات میں تاخیر کی خبروں میں کوئی حقیقت نہیں ، یہ بے بنیاد اور گمراہ کن پراپیگنڈا ہے۔
الیکشن کمیشن آف پاکستان کی طرف سے جاری بیان کے مطابق میڈیا پر نشر ہونے والی آئندہ عام انتخابات موخر ہونے کی خبروں میں کوئی حقیقت نہیں نہ ہی انتخابی فہرستیں مکمل نہ ہونے کی خبروں میں کوئی صداقت ہے۔ الیکشن کمیشن نے ایسی خبروں کی سختی سے تردید کرتے ہوئے کہا کہ اس طرح کی گمراہ کن خبریں پھیلانے والوں کے خلاف سخت قانونی کارروائی عمل میں لائی جائے گی۔
ترجمان الیکشن کمیشن کا کہنا تھا کہ مختلف ٹی وی چینلز پر عام انتخابات میں تاخیر کے حوالے سے چلنے والی خبروں کا ٹرانسکرپٹ اور ریکارڈ منگوا لیا گیا ہے۔ الیکشن کمیشن نے فیصلہ کیا ہے کہ جھوٹی خبریں پھیلانے والوں کے خلاف پاکستان الیکٹرانک میڈیا ریگولیٹری اتھارٹی (پیمرا) سے رجوع کیا جائے گا۔
الیکشن کمیشن کے بیان کے مطابق خبروں کی ٹرانسکرپٹ اور ریکارڈنگ آنے کے بعد ان ٹی وی چینلز کے خلاف پیمرا کو کارروائی کے لیے درخواست دیں گے۔ یاد رہے کہ صدر مملکت اور چیف الیکشن الیکشن کمشنر سکندر سلطان راجہ نے مشاورت کے بعد 8 فروری 2024ء بروز جمعرات کو عام انتخابات کروانے پر اتفاق کیا تھا اور سپریم کورٹ آف پاکستان میں اس حوالے سے جواب جمع کروایا گیا تھا۔
الیکشن کمیشن کی طرف سے بے بنیاد خبروں پر ٹی وی چینلز کے خلاف کارروائی کا عندیہ دینے کے بعد سینئر صحافی مغیث علی نے اپنے ایکس (ٹوئٹر) پیغام میں لکھا کہ: اہم ترین: میڈیا کے حلقوں میں انتخابات میں تاخیر کی خبریں بالکل بے بنیاد اور گمراہ کن ہیں، پرزور تردید کرتے ہیں، جھوٹی خبریں پھیلانے والوں کے خلاف پیمرا سے رجوع کرنے کا فیصلہ کیا ہے، ترجمان الیکشن کمیشن۔۔۔!!!
سینئر صحافی ثاقب ورک نے لکھا کہ:الیکشن کمیشن نےمیڈیا کے حلقوں میں انتخابات میں تاخیر کی خبروں کو بالکل بے بنیاد اور گمراہ کن قرار دیتے ہوئے خبریں پھیلانے والوں کے خلاف قانونی کارروائی کرنے کا فیصلہ کیا ہے اور اس سلسلے میں الیکشن کمیشن نے مختلف چینلز پر چلنے والی خبروں کی ٹرانسکرپٹ اور ریکارڈنگ منگوا لی ہیں !!
یاد رہے کہ سپریم کورٹ آف پاکستان کے حکم پر صدر مملکت سے اٹارنی جنرل منصور عثمان اور چیف الیکشن کمشنر سکندر سلطان راجہ نے الیکشن کمیشن اراکین کے ہمراہ ملاقات کی تھی۔ صدر مملکت کے سامنے عام انتخابات کے لیے 3 تاریخیں (28 جنوری، 4 فروری اور 11 فروری) رکھی گئی تھیں۔ ذرائع کا کہنا تھا کہ اتفاق رائے نہ ہونے پر درمیانی تاریخ (8 فروری) کی تجویز سامنے آئی تھی جس پر اتفاق ہوا تھا۔
- Featured Thumbs
- https://www.siasat.pk/data/files/s3/10ecpakkakejsjhurunrk.png
