چیئرمین جوائنٹ چیفس آف سٹاف کمیٹی جنرل ندیم رضا کی ریٹائرمنٹ سے پہلے خصوصی تقریب کا انعقاد کیا گیا۔
انٹر سروسز پبلک ریلیشنز پاکستان (آئی ایس پی آر) کے اعلامیہ کے مطابق چیئرمین جوائنٹ چیفس آف سٹاف کمیٹی جنرل ندیم رضا کی ریٹائرمنٹ سے پہلے خصوصی تقریب کا انعقاد کیا گیا جس میں سابق چیئرمین جوائنٹ چیفس آف سٹاف کمیٹی جنرل ندیم رضا کے علاوہ دیگر سینئر افسران شریک ہوئے۔
تقریب سے خطاب کرتے ہوئے چیئرمین جوائنٹ چیفس آف سٹاف کمیٹی جنرل ندیم رضا نے کہا کہ میں اللہ تعالیٰ کا شکر ادا کرتا ہوں کہ اس نے مجھے اپنے فرائض کو انصاف، ایمانداری اور وقار کے ساتھ ادا کرنے کا موقع دیا۔ ان کا کہنا تھا کہ پاکستان کے دفاع کو پاک فوج کے بہادر سپاہی مضبوط بنانے کے لیے کوئی بھی قربانی دینے سے گریز نہیں کرینگے، پاکستان کا دفاع ناقابل تسخیر ہے۔
آئی ایس پی آر کے مطابق چیئرمین جوائنٹ چیفس آف سٹاف کمیٹی جنرل ندیم رضا کو بری، بحری اور فضائی افواج کے چاق وچوبند دستوں نے گارڈ آف آنر پیش کیا۔ جنرل ندیم رضا نے مارچ پاسٹ اور گارڈ آف آنر کا معائنہ کیا، وہ کل ریٹائر ہو رہے ہیں۔
قبل ازیں گزشتہ روز چیئرمین جوائنٹ چیفس آف سٹاف کمیٹی جنرل ندیم رضا نے وزیرِ اعظم شہباز شریف سے الوداعی ملاقات کی تھی جس میں وزیرِ اعظم شہباز شریف نے جنرل ندیم رضا کی دفاعِ وطن کو مضبوط بنانے اور پاک فوج کے لیے خدمات کو سراہتے ہوئے کہا تھا کہ ہمیں پاکستان کے لیے آپ کی خدمات پر فخر ہے! وزیرِ اعظم شہباز شریف نے جنرل ندیم رضا کے لیے نیک تمناؤں کا اظہار کیا تھا جس پر جنرل ندیم رضا نے وزیرِ اعظم شہباز شریف کا شکریہ ادا کیا۔